სლოვაკეთის პრემიერ-მინისტრმა რობერტ ფიცომ განაცხადა, რომ არ დაუჭერს მხარს ევროკომისიის წინადადებას, გაყინული რუსული აქტივების გამოყენებით უკრაინისთვის "რეპარაციების" სესხი გამოყოფის შესახებ თუ ეს თანხები სამხედრო მიზნებისთვის იქნება გამიზნული.
სლოვაკეთის მთავრობის მეთაურმა განაცხადა, რომ მან ოფიციალური წერილი გაუგზავნა ევროპის საბჭოს პრეზიდენტს, ანტონიო კოშტას.
თავის მიმართვაში ფიცომ გააფრთხილა, რომ ევროკავშირის ლიდერების მომავალ შეხვედრაზე ის დაბლოკავს ნებისმიერ გადაწყვეტილებას, რომელიც უკრაინის სამხედრო საჭიროებებს 2026-2027 წლებისთვის დააფინანსებს.
„მე ნათლად და ცალსახად გამოვხატავ ჩემს პოზიციას უკრაინაში სამხედრო კონფლიქტთან დაკავშირებით. ამ კონფლიქტს სამხედრო გადაწყვეტა არ აქვს. ევროკავშირის კონფლიქტის სტრატეგია არასრულყოფილი და არაეფექტურია, ხოლო ომის გაგრძელება სხვა არაფერია, თუ არა უაზრო მკვლელობა უკრაინის პოზიციების გაძლიერების გარეშე სამშვიდობო მოლაპარაკებების შემთხვევაში.
არავითარ შემთხვევაში არ დავუჭერ მხარს უკრაინის სამხედრო საჭიროებების დაფინანსების შესახებ რაიმე გადაწყვეტილებას, რომელშიც სლოვაკეთის რესპუბლიკას მოუწევს მონაწილეობა. ამავდროულად, მე პატივს ვცემ ევროკავშირის თითოეული წევრი სახელმწიფოს სუვერენულ უფლებას, მიიღოს გადაწყვეტილებები ამ საკითხთან დაკავშირებით,“ - განაცხადა ფიცომ.
ამ გადაწყვეტილების მთავარ მიზეზად ის საკუთარ „მშვიდობის პოლიტიკას“ ასახელებს, რომელიც არ იძლევა „ომისთვის ათობით მილიარდი ევროს გამოყოფისთვის ხმის მიცემის“ უფლებას.
პარალელურად სლოვაკეთის პრემიერ-მინისტრმა ხაზი გაუსვა აშშ-ის პრეზიდენტ დონალდ ტრამპის „სამშვიდობო ინიციატივების“ მხარდაჭერა.
ფიცოს თქმით, გაყინული რუსული აქტივების უკრაინის თავდაცვის საჭიროებებისთვის გამოყენებამ შესაძლოა საფრთხე შეუქმნას აშშ-ს გეგმებს, რადგან, მისი თქმით, ტრამპი ამ რესურსების უკრაინის ომისშემდგომი რეკონსტრუქციისთვის გამოყენებას გეგმავს.
ფიცომ ასევე გააკრიტიკა კიევი გაზის ტრანზიტის შეჩერების გამო, რამაც, მისი თქმით, მის ქვეყანას ზარალი მიაყენა.
ამავდროულად, ფიცომ განაცხადა, რომ მისი მთავრობა ჰუმანიტარულ საკითხებში „პასუხისმგებლიან და სოლიდარულ მოთამაშედ“ რჩება. მან აღნიშნა, რომ სლოვაკეთმა შეიფარა თითქმის 200 000 უკრაინელი ლტოლვილი. მისი თქმით, სლოვაკეთი მუშაობს ახალ ენერგეტიკულ და სარკინიგზო კავშირებზე და აღადგენს სასაზღვრო გადასასვლელებს.
ევროინტეგრაციასთან დაკავშირებით, პრემიერ-მინისტრმა მხარდაჭერა გამოუცხადა უკრაინის ევროკავშირში გაწევრიანებას, თუმცა აღნიშნა, რომ წევრ ქვეყნებს შორის იზრდება კიევის სწრაფი გაწევრიანების პერსპექტივების მიმართ სკეპტიკოსების რაოდენობა.
