დიდი ბრიტანეთის, გერმანიისა და საფრანგეთის ლიდერებმა სატელეფონო სუაბარი გამართეს აშშ-ის პრეზიდენტთან, დონალდ ტრამპთან. შესაბამის ინფორმაციას გერმანიის მთავრობის პრესსამსახური ავრცელებს.
განცხადების თანახმად, ფრიდრიხ მერცმა, კირ სტარმერმა, ემანუელ მაკრონმა და დონალდ ტრამპმა განიხილეს უკრაინაში ცეცხლის შეწყვეტის შესახებ მოლაპარაკებების მიმდინარეობა.
„სამშვიდობო გეგმაზე ინტენსიური მუშაობა უახლოეს დღეებში გაგრძელდება“, – აღნიშნულია განცხადებაში.
ინფორმაციას საუბრის შესახებ საფრანგეთის პრეზიდენტი, ემანუელ მაკრონი და დიდი ბრიტანეთის პრემიერ-მინისტრის ადმინისტრაციაც ავრცელებენ.
„დაახლოებით 40 წუთი გვქონდა საკითხის განხილვისთვის, რომელიც ყველას გვაწუხებს“, - განაცხადა მაკრონმა.
ბრიტანეთის პრემიერ-მინისტრის ადმინისტრაციის ცნობით, სამშვიდობო გეგმაზე ინტენსიური მუშაობა მიმდინარეობს.
„სამშვიდობო გეგმაზე ინტენსიური მუშაობა მიმდინარეობს და გაგრძელდება უახლოეს დღეებში. ისინი [ლიდერები] შეთანხმდნენ, რომ ეს კრიტიკული მომენტია - უკრაინისთვის, მისი ხალხისთვისა და ევრო-ატლანტიკური რეგიონის მასშტაბით საერთო უსაფრთხოებისთვის“, - ნათქვამია განცხადებაში.
