ვაშინგტონი და კიევი, უკრაინაში ომის დასრულების გეგმის ფარგლებში, განიხილავენ წინადადებას 2027 წლისთვის ევროკავშირში უკრაინის გაწევრიანების შესახებ.  ამის შესახებ The Washington Post-ის მიმომხილველი დევიდ იგნატიუსი ამერიკელ და უკრაინელ მაღალჩინოსნებზე დაყრდნობით წერს.

მისი თქმით, პრეზიდენტ დონალდ ტრამპის ადმინისტრაცია მიიჩნევს, რომ შესაძლებელია ევროკავშირის სახელმწიფოების, მათ შორის უნგრეთის წინააღმდეგობის დაძლევა, რომლებიც უკრაინის დაჩქარებული მიღების წინააღმდეგი არიან.

ვაშინგტონის გეგმის თანახმად, ევროკავშირში წევრობამ უნდა წაახალისოს უკრაინის ეკონომიკური განვითარება, გამოიწვიოს ვაჭრობისა და ინვესტიციების გაფართოება და გააძლიეროს ბრძოლა კორუფციის წინააღმდეგ.

ამავდროულად, განიხილება დონეცკის ოლქიდან ხერსონამდე და ზაპოროჟიემდე ცეცხლის შეწყვეტის ხაზის გასწვრივ დემილიტარიზებული ზონის შექმნის იდეა.

იგნატიუსი წერს, რომ ამ ზონის მიღმა შეიძლება გაჩნდეს კიდევ ერთი, უფრო ღრმა ზონა, სადაც მძიმე შეიარაღება აიკრძალება.

დაგეგმილია მისი მუდმივი მეთვალყურეობის ქვეშ განთავსება, სამხრეთ და ჩრდილოეთ კორეას შორის არსებული დემილიტარიზებული ზონის მსგავსად.

WP-ის ცნობით, შეერთებული შტატები მზადაა უკრაინას მიაწოდოს უსაფრთხოების გარანტიები, რომლებიც თავსებადია ნატო-ს წესდების მე-5 მუხლთან.

კიევი დაჟინებით მოითხოვს, რომ ასეთი დოკუმენტი არა მხოლოდ ხელმოწერილი, არამედ რატიფიცირებულიც იყოს აშშ-ის კონგრესის მიერ.

თავის მხრივ, ევროპულ სახელმწიფოებს მოუწევთ საკუთარი გარანტიების უზრუნველყოფა.

აშშ-ის ეროვნული უსაფრთხოების ახალი სტრატეგია ეჭვქვეშ აყენებს ვაშინგტონის მზადყოფნას, გაუწიოს სამხედრო დახმარება რუსული აგრესიის განახლების შემთხვევაში, თუმცა ტრამპის გუნდი ირწმუნება, რომ აშშ გააგრძელებს უკრაინისთვის სადაზვერვო ინფორმაციის მიწოდებას.

WP აღნიშნავს, რომ სხვა წინადადებებთან ერთად, განიხილება ზაპოროჟიეს ატომური ელექტროსადგურის აშშ-ის კონტროლის ქვეშ გადაცემა.