შავ ზღვაში, თურქეთის სანაპიროდან დაახლოებით 130 კმ-ის დაშორებით, რუსეთიდან საქართველოსკენ მიმავალ ტანკერ Midvolga-2-ზე თავდასხმა მოხდა
ამის შესახებ უკრაინული მედია უკრაინის საზღვაო საქმეთა მთავარ სამმართველოზე დაყრდნობით იუწყება.
აღნიშნულია, რომ გემს მზესუმზირის ზეთი გადაჰქონდა.
ბორტზე ეკიპაჟის 13 წევრი იმყოფება. გემს დახმარება არ დასჭირვებია, დაშავებულების შესახებ ინფორმაცია არ ვრცელდება.
ეს ბოლო კვირის განმავლობაში რუსეთიდან პროდუქციის გადამტანი ტანკერებზე მომხდარი მეოთხე ინციდენტია.
მანამდე გავრცელდა ინფორმაცია, რომ პარასკევს, 28 ნოემბერს, ორ სანქცირებულ ტანკერს, KAIROS-სა და VIRAT-ს, თურქეთის სანაპიროსთან დარტყმების შედეგად შავ ზღვაში ცეცხლი გაუჩნდა.
ასევე გავრცელდა ინფორმაცია, რომ რუსეთთან დაკავშირებული ნავთობტანკერი „მერსინი“ დასავლეთ აფრიკაში, სენეგალის სანაპიროსთან აფეთქებების შედეგად დაზიანდა.
