შეერთებული შტატების სენატის საგარეო კომიტეტის თავმჯდომარე, რესპუბლიკელი სენატორი ჯიმ რიში და ამავე კომიტეტის წამყვანი წევრი, დემოკრატი სენატორი ჯინ შაჰინი 2024 წლის 28 ნოემბრის მოვლენებიდან ერთი წლისთავს ერთობლივი განცხადებით ეხმიანებიან.
სენატორები მოუწოდებენ მთავრობას, დაუყოვნებლივ შეცვალოს კურსი და დაუბრუნდეს დემოკრატიულ მმართველობას.
"ერთი წლის წინ, ამ დღეს, საქართველომ თავისი თანამედროვე ისტორიის ახალი ბნელი თავი დაიწყო. წინასაარჩევნო კამპანიის დროს, ევროპული ინტეგრაციის განუხრელად გაგრძელების დაპირების მიუხედავად, რომელსაც საქართველოს მოსახლეობის უმრავლესობა უჭერდა მხარს, მთავრობამ შეცვალა თავისი პოზიცია და დაარღვია კონსტიტუციური ვალდებულება. ამის პასუხად, ქართველები ცვლილებების მოთხოვნით და მთავრობის ამომრჩევლებისადმი უგულვებელყოფის გასაპროტესტებლად ქუჩებში გამოვიდნენ.
მას შემდეგ, ერთი წლის განმავლობაში, ამომრჩევლების შეშფოთების მოგვარებისა და პოლიტიკურ ოპოზიციასთან თანამშრომლობის ნაცვლად, მთავრობამ უპრეცედენტო ნაბიჯები გადადგა მათ ჩასახშობად, ავტორიტარული კანონების მიღებით, ოპოზიციონერი პოლიტიკოსების დაპატიმრებითა და აკრძალვით, სამოქალაქო საზოგადოების ლიდერების დაშინებითა და შეერთებული შტატებისა და მისი საელჩოს პერსონალის ცილისწამებით.
საქართველოში პოლიტიკური ძალადობის გამწვავების ფონზე, ჩვენ სულ უფრო მეტად გვაშფოთებს საქართველოს მთავრობის მიერ საკუთარი ხალხის წინააღმდეგ მიმართული დევნა. როგორც ამერიკელები აღფრთოვანებულები ვართ იმით, რომ ქართველი ხალხი თავის თავისუფლებას არაფრის ფასად არ თმობს.
როგორც საქართველოს ახლო მეგობრები, ჩვენ წლების განმავლობაში ვაკვირდებოდით საქართველოში მიმდინარე პოლიტიკურ მოვლენებს და ღრმად ვართ დაინტერესებულნი ქვეყნის წარმატებით. ქართველი ხალხი იმსახურებს ლიდერობას, რომელიც პატივს სცემს მათ უფლებას, განსაზღვრონ თავიანთი ქვეყნის მომავალი. მოვუწოდებთ მთავრობას დაუყოვნებლივ შეცვალოს კურსი, აღადგინოს პოლიტიკური თავისუფლებები საქართველოში და ხელახლა დაუჭიროს მხარი დემოკრატიულ მმართველობას", - წერენ სენატორები განცხადებაში.
