თეთრი სახლის პრესმდივანმა ქეროლაინ ლევიტმა განაცხადა, რომ შეერთებულ შტატებს არ შეუძლია უკრაინისთვის იარაღის მიწოდების განუსაზღვრელი ვადით გაგრძელება. ამის შესახებ მან Fox News-თან ინტერვიუში ისაუბრა.
პრესასთან საუბრისას ლევიტმა განაცხადა, რომ აშშ-ის პრეზიდენტმა „უზარმაზარი დრო და ენერგია ჩადო“ რუსეთის მიერ უკრაინის წინააღმდეგ ომის გადაწყვეტის გზების ძიებაში, რისთვისაც იგი მადლიერებას იმსახურებს.
მან ხაზგასმით აღნიშნა, რომ ტრამპის მთავარი მიზანი მკვლელობების შეჩერება და ომის საბოლოოდ დასრულებაა.
ლევიტმა აღნიშნა, რომ ამერიკის პრეზიდენტის იმედგაცრუება პირდაპირ ასახავს ამერიკული საზოგადოების განწყობას.
მან დასძინა, რომ მიუხედავად იმისა, რომ ტრამპმა „შეწყვიტა ამ ომის დაფინანსება“, შეერთებული შტატები ნატო-ს მექანიზმების მეშვეობით კვლავ აგრძელებს უკრაინისთვის მნიშვნელოვანი რაოდენობით იარაღის გაგზავნას ან გაყიდვას.
„ამას დაუსრულებლად ვერ გავაკეთებთ. პრეზიდენტს სურს, რომ ეს ომი დასრულდეს“, - თქვა ლევიტმა.
