რუსეთის პრეზიდენტმა, ვლადიმირ პუტინმა განაცხადა, რომ რუსეთმა უკრაინასთან სამშვიდობო შეთანხმებისთვის აშშ-ს მიერ შემუშავებული 28-პუნქტიანი გეგმა მიიღო, თუმცა აღნიშნა, რომ რუსეთში დოკუმენტის ტექსტი შინაარსიანად არ განუხილავთ.
მისი თქმით, გეგმას, შესაძლოა, ჰქონდეს პოტენციალი, გახდეს რუსეთ-უკრაინის ომის მშვიდობიანი მოგვარების საფუძველი.
"ჩვენ ამ ტექსტს ვფლობთ. ის მიღებული გვაქვს აშშ-ის ადმინისტრაციასთან არსებული საკომუნიკაციო არხებით. მგონია, რომ ეს ტექსტიც შეიძლება, გახდეს საბოლოო მშვიდობიანი შეთანხმების საფუძველი, თუმცა არსებითად, სიღრმისეულად ეს ტექსტი ჩვენთან განხილული არ არის. შემიძლია ვივარაუდო, რატომ. მიზეზი, ვფიქრობ, იგივეა – აშშ-ის ადმინისტრაციას ჯერჯერობით არ შეუძლია, მიიღოს უკრაინის თანხმობა. უკრაინა წინააღმდეგია.ამის შესახებ პუტინმა რუსეთის უშიშროების საბჭოზე გამოსვლისას თქვა.
პუტინის თქმით, უკრაინა და მისი ევროპელი მოკავშირეები, სავარაუდოდ, კვლავ იმის ილუზიაში არიან, რომ ბრძოლის ველზე რუსეთისთვის სტრატეგიული მარცხის მიყენებაა შესაძლებელი.
"როგორც ჩანს, უკრაინა და მისი ევროპელი მოკავშირეები კვლავ ილუზიებში არიან და ოცნებობენ რუსეთის სტრატეგიულ დამარცხებაზე, ბრძოლის ველზე. ვფიქრობ, ამ პოზიციას საფუძვლად უდევს არა იმდენად კომპეტენციის დაბალი დონე, და ამ ნაწილს ახლა არ განვიხილავ, არამედ, უფრო სავარაუდოდ, მათ არ აქვთ ობიექტური ინფორმაცია ბრძოლის ველზე რეალური ვითარების შესახებ", - განაცხადა პუტინმა.
რუსეთის პრეზიდენტის თქმით, უკრაინა ბრძოლის ველზე არსებული ვითარების შესახებ ან ობიექტურ ინფორმაციას არ ფლობს, ან არ შეუძლია მისი ობიექტურად შეფასება.
"თუ კიევში პრეზიდენტი ტრამპის წინადადებების განხილვა არ სურთ და ამაზე უარს ამბობენ, მაშინ მათ და ომის ევროპელ წამქეზებლებს უნდა ესმოდეთ, რომ მოვლენები, რომლებიც კუპიანსკში მოხდა, გარდაუვალად მოხდება ფრონტის სხვა საკვანძო მონაკვეთებზეც. შეიძლება ისე სწრაფად არა, როგორც ვისურვებდით, მაგრამ ეს გარდაუვალად გამეორდება... მაგრამ ჩვენ, როგორც აქამდე არაერთხელ მითქვამს, მზად ვართ სამშვიდობო მოლაპარაკებებისთვისაც, პრობლემების მშვიდობიანი გზით მოგვარებისთვის. მაგრამ ეს საჭიროებს, რა თქმა უნდა, შემოთავაზებული გეგმის ყველა დეტალის საგნობრივად განხილვას. მზად ვართ ამისთვის“, – განაცხადა პუტინმა.
