ეროვნული უსაფრთხოებისა და თავდაცვის საბჭოს მდივანმა, რუსტემ უმეროვმა, განაცხადა, რომ უკრაინულმა და რუსულმა მხარეებმა ტყვეთა გაცვლის შესახებ მოლაპარაკებები გააქტიურეს, რაც რუსეთის ტყვეობიდან 1200 უკრაინელის გათავისუფლებას ითვალისწინებს.
„უკრაინის პრეზიდენტის დავალებით, ცოტა ხნის წინ თურქეთისა და არაბთა გაერთიანებული საამიროების პარტნიორების შუამავლობით, ჩავატარე კონსულტაციები გაცვლის პროცესის აღდგენისა და ჩვენი ხალხის რუსული ტყვეობიდან გათავისუფლების შესახებ. ამ მოლაპარაკებების შედეგად, მხარეები შეთანხმდნენ სტამბოლის შეთანხმებების ამოქმედებაზე. ეს ეხება 1200 უკრაინელი ტყვის გათავისუფლებას“, - წერს უმეროვი.
უმეროვმა განაცხადა, რომ უახლოეს მომავალში გაიმართება ტექნიკური კონსულტაციები ყველა პროცედურული და ორგანიზაციული საკითხის დასასრულებლად.
„ჩვენ განუწყვეტლივ ვმუშაობთ იმის უზრუნველსაყოფად, რომ უკრაინელებმა, რომლებიც ტყვეობიდან უნდა დაბრუნდნენ, ახალი წლისა და შობის დღესასწაულები სახლში - ოჯახურ სუფრასთან და საყვარელ ადამიანებთან ერთად აღნიშნონ“, - დასძინა მან.
