აშშ-ის პრეზიდენტმა დონალდ ტრამპმა იმედი გამოთქვა, რომ რუსეთ-უკრაინის ომი უახლოეს მომავალში დასრულდება რუსეთის წინააღმდეგ მეორადი სანქციების გამკაცრების გზით.

მისი თქმით, ბოლო ერთი თვის განმავლობაში ორივე მხრიდან დაღუპულთა რაოდენობამ 25 000-ს მიაღწია.

„გასულ კვირას მათ განაცხადეს, რომ ბოლო თვეში ორ ქვეყანას შორის 25 000 ჯარისკაცი დაიღუპა, დაახლოებით თანაბრად.

დაფიქრდით - 25 ათასი ახალგაზრდა, სხვათა შორის, ახლა ისინი ბერდებიან, მაგრამ ახალგაზრდა ჯარისკაცები დაიღუპნენ. ეს არასდროს მოხდებოდა, მე რომ პრეზიდენტი ვყოფილიყავი. ვფიქრობ, რომ პრეზიდენტ პუტინთან ძალიან კარგი ურთიერთობა მქონდა“, - განაცხადა ტრამპმა ბრიტანულ ტელეარხ GB News-თან ინტერვიუში.

მან აღნიშნა, რომ „მეორე მსოფლიო ომის შემდეგ მსგავსი არაფერი მომხდარა“, თუმცა იმედი გამოთქვა, რომ ომის დასრულებას შეძლებს.

 „ეს მოხდება. იმედი მაქვს, მალე მოხდება. ჩვენ მათზე დიდ ზეწოლას ვახდენთ, იცით, ინდოეთისა და ნავთობის საკითხში და ინდოეთი ახლა გადის და სხვებიც გადიან, რადგან როდესაც რუსეთი ნავთობს ყიდის, მათ აქვთ ფული რაღაცის გასაკეთებლად. მაგრამ მე ვფიქრობ, რომ ჩვენ ამას გავაკეთებთ. თუმცა ეს სირცხვილია“, - განაცხადა აშშ-ის პრეზიდენტმა.

შეკითხვაზე, აღიზიანებს თუ არა ის, რომ უკრაინაში ომის დასრულებაში მისი ძალისხმევა უშედეგოა, ტრამპმა უპასუხა, რომ კი.

„ეს ასეა. რვა ომი მოვაგვარე და ერთი დამრჩა... მეგონა, უფრო ადვილი იქნებოდა, რადგან დავასრულე რამდენიმე ომი, რომელიც ერთ შემთხვევაში 32 წელი გაგრძელდა. და მე გადავწყვიტე, რომ ეს ორ დღეში გამეკეთებინა. ძალიან ვამაყობ ამით“, - თქვა მან.

აშშ-ის პრეზიდენტმა ასევე განაცხადა, რომ მან შეძლო ინდოეთსა და პაკისტანს შორის ომის შეჩერება.

„ბირთვული სახელმწიფოები! და იცით, ისინი მართლაც იბრძოდნენ. რვა თვითმფრინავი ჩამოაგდეს. და ვინ იცის, რა მოხდებოდა ძლიერი ბირთვული იარაღის შემთხვევაში. და მე ვუთხარი, მისმინე, თუ ბრძოლას აპირებ, მე შენთან არანაირ სავაჭრო შეთანხმებას არ დავდებ.

და მე ტარიფები დავაწესე და სხვა ყველანაირი საქმე გავაკეთე. და 48 საათში მე ეს გავაკეთე, მე ეს მოვაგვარე. და ეს დიდი საქმეა. მაგრამ ეს რვაჯერ გავაკეთე და ერთადერთი, რაც ჯერ არ გამიკეთებია, რუსეთი და უკრაინაა. ეს არასდროს უნდა მომხდარიყო. ეს სისხლისიანი ხოცვა-ჟლეტაა, ეს საშინელი ხოცვა-ჟლეტაა“, - თქვა ტრამპმა.