პარასკევს ღამით, რუსულმა ძალებმა კიევზე სხვადასხვა ტიპის რაკეტებისა და დრონების გამოყენებით მასშტაბური, კომბინირებული იერიში მიიტანეს.
დარტყმების შედეგად ერთი ადამიანი დაიღუპა და 24 დაშავდა, მათ შორის ორსული ქალი და ბავშვი.
უკრაინის დედაქალაქის თითქმის ყველა რაიონში საცხოვრებელი შენობებისა და სამოქალაქო ინფრასტრუქტურის ობიექტებში მრავალი ნგრევა და ხანძარი დაფიქსირდა.
სამხედრო ადმინისტრაციის ცნობით, ღამის თავდასხმის შედეგად დაშავებულთა რიცხვი 24-მდე გაიზარდა, მათ შორის ერთი ბავშვია.
ყველა დაშავებულს კვალიფიციური სამედიცინო დახმარება უტარდება.
საგანგებო სიტუაციების სამსახურის ინფორმაციით, დაიღუპა ერთი ადამიანი. მათივე ცნობით, მაშველებმა სამაშველო ოპერაციის დროს 40-ზე მეტი ადამიანი გადაარჩინეს.
მასირებულ შეტევას მრავალსართულიან სახლებში ბინების ნგრევა და ხანძრები მოჰყვა კიევის ექვს რაიონში. ხანძრები გაჩნდა ერთ-ერთი სკოლის, საავადმყოფოს და სპორტული ბაზის ტერიტორიებზეც.
რუსეთის ძალებმა რაკეტებით და დრონებით შეუტიეს კიევის ოლქსაც, სადაც, ადგილობრივი ხელისუფლების ინფორმაციით, სულ მცირე 6 ადამიანი დაშავდა. დაზიანებული და დამწვარია სახლები და სხვა შენობები.
