უკრაინის პრეზიდენტ ვოლოდიმირ ზელენსკისთან სატელეფონო საუბრისას, გერმანიის კანცლერმა ფრიდრიხ მერცმა მოუწოდა მას „ენერგიულად გააგრძელოს ბრძოლა კორუფციის წინააღმდეგ და განაგრძოს რეფორმები, განსაკუთრებით კანონის უზენაესობის სფეროში“.
პოლიტიკოსების საუბარი უკრაინის სახელმწიფო კომპანია „ენერგოატომის“ ირგვლივ ატეხილი კორუფციული სკანდალის ფონზე გაიმართა.
როგორც გერმანიის მთავრობის პრესრელიზშია აღნიშნული, თავის მხრივ, ზელენსკიმ მერცს უკრაინის მთავრობის გადამდგარი წევრების გამოძიების მიმდინარეობის შესახებ მიაწოდა ინფორმაცია. მან „სრული გამჭვირვალობა და ანტიკორუფციული სააგენტოების გრძელვადიანი მხარდაჭერა, ასევე შემდგომი სასწრაფო ზომების მიღება აღუთქვა, რომლებიც უკრაინის მოსახლეობის, ევროპელი პარტნიორებისა და საერთაშორისო დონორების ნდობის აღდგენას ისახავს მიზნად“.
უკრაინის ლიდერმა ასევე მადლობა გადაუხადა ფრიდრიხ მერცს გერმანიის მხარდაჭერისთვის, განსაკუთრებით საჰაერო თავდაცვისა და უკრაინის ენერგეტიკული ინფრასტრუქტურის დაცვის სფეროში.
უკრაინის პრეზიდენტი და გერმანიის მთავრობის მეთაური ასევე შეთანხმდნენ, რომ ევროპელ და ტრანსატლანტიკურ პარტნიორებთან მჭიდრო კოორდინაციით, გააგრძელებენ ცეცხლის შეწყვეტისა და გრძელვადიანი მშვიდობის მიღწევისთვის ძალისხმევას.
თავის მხრივ, მერცმა ხაზგასმით აღნიშნა, რომ გერმანია, დასავლელ პარტნიორებთან ერთად, გააგრძელებს მოსკოვზე ზეწოლას, რათა დაითანხმოსმონაწილეობა მიიღოს სამშვიდობო მოლაპარაკებებში.
ცნობისათვის, უკრაინის ეროვნულმა ანტიკორუფციულმა ბიურომ მასშტაბური კორუფციული საქმის გახსნის შესახებ გაავრცელა ინფორმაცია. საქმე ეხება უკრაინის სახელმწიფო კომპანიის „ენერგოატომის“ თანხების გაფლანგვას. სამართალდამცველებმა რამდენიმე ადამიანის სახლში, მათ შორის გერმან გალუშენკოს სახლში ჩხრეკა ჩაატარეს. თანამდებობა დატოვეს იუსტიციის მინისტრმა გერმან გალუშენკომ და ენერგეტიკის მინისტრმა სვეტლანა გრინჩუკმა. კორუფციული სქემის ფიგურანტია ზელენსკის ახლო მეგობარი თემურ მინდიჩი, რომელმაც ქვეყანა უკვე დატოვა.
