კოლუმბიის პრეზიდენტმა გუსტავო პეტრომ კოლუმბიის საზოგადოებრივი უსაფრთხოების ძალებს აშშ-ის სადაზვერვო სააგენტოებთან დაზვერვის მონაცემების გაცვლის შეწყვეტის ბრძანება გასცა. ამის შესახებ Reuters იუწყება.
პეტრომ განაცხადა, რომ ბრძანება ძალაში დარჩება მანამდე, ვიდრე ვაშინგტონი კარიბის ზღვის აუზში გემებზე თავდასხმებს არ შეწყვეტს.
„საზოგადოებრივი უსაფრთხოების დაზვერვის ყველა დონისთვის გაცემულია ბრძანება, შეაჩერონ ცნობების მიწოდება და ამერიკულ სტრუქტურებთან ურთიერთქმედების სხვა ფორმები. ეს ზომა ძალაში დარჩება მანამდე, ვიდრე კარიბის ზღვის აუზში გემებზე სარაკეტო თავდასხმები გაგრძელდება. ნარკოტიკებით ვაჭრობის წინააღმდეგ ბრძოლა კარიბის ზღვის რეგიონის ხალხების ადამიანის უფლებებს უნდა დაექვემდებაროს“, - დაწერა პეტრომ X-ში.
პრეზიდენტმა პეტრომ არაერთხელ გააკრიტიკა ვაშინგტონის ქმედებები.
მანამდე მანპრეზიდენტი დონალდ ტრამპი ნარკოტიკებით ვაჭრობასთან ბრძოლის საბაბით ვენესუელის დაპყრობის მცდელობაში დაადანაშაულა და განაცხადა, რომ აშშ ბოლივარიული რესპუბლიკის ნავთობის რესურსებზე კონტროლის დამყარებას ცდილობს.
კოლუმბიის ლიდერმა ასევე განაცხადა, რომ გემებზე თავდასხმები, რამაც ლათინური ამერიკის ათობით მოქალაქის სიცოცხლე შეიწირა, ძალის გადაჭარბებულ გამოყენებას და საერთაშორისო სამართლის დარღვევას წარმოადგენდა.
ამ განცხადებების შემდეგ, აშშ-ის ფინანსთა დეპარტამენტმა სანქციები დააწესა გუსტავო პეტროს, მისი მეუღლის, ვერონიკა ალკოსერის, მისი ვაჟის, ნიკოლასის და შინაგან საქმეთა მინისტრის, არმანდო ბენედეტის წინააღმდეგ.
კოლუმბიის ლიდერმა ამ გადაწყვეტილებას „ჩაგვრის რეჟიმისთვის დამახასიათებელი“ ზომები უწოდა.
შეგახსენებთ, სულ მცირე ექვსი ადამიანი დაიღუპა აღმოსავლეთ წყნარ ოკეანეში აშშ-ის მიერ ნარკოკარტელებთან დაკავშირებული ორი გემის დაბომბვის შედეგად.
აშშ-მა კარიბის ზღვის აუზსა და წყნარი ოკეანის სანაპიროებთან გემებზე საერთო ჯამში, სულ მცირე, 19 დარტყმა განახორციელა, რის შედეგადაც, სულ მცირე, 76 ადამიანი დაიღუპა.
ლათინურ ამერიკაში ჩატარებულმა ოპერაციებმა დიპლომატიური დაძაბულობა გამოიწვია.
