11 სექტემბერს, უკრაინის პრეზიდენტი ვოლოდიმირ ზელენსკი კიევში ვიზიტად მყოფ აშშ-ის პრეზიდენტის სპეციალურ წარმომადგენელს კიტ კელოგს შეხვდა.
„ჩვენ ვისაუბრეთ თანამშრომლობის სხვადასხვა ვექტორზე - როგორ მივაღწიოთ რეალურ მშვიდობას და უკრაინისთვის უსაფრთხოების გარანტიას. ეს არის PURL ინიციატივის ფარგლებში ინდივიდუალური პროექტები, რომლებიც მიზნად ისახავს Patriot-ების წარმოებისა და შესყიდვის დაფინანსებას, ჩვენ ამერიკას შევთავაზეთ უპილოტო საფრენი აპარატებისა და იარაღის ერთობლივი წარმოების შესახებ ორმხრივი შეთანხმებები. ჩვენ აშშ-სგან დადებით რეაქციას ველით“, - განაცხადა ზელენსკიმ.
მხარეებმა ასევე დეტალურად განიხილეს რუსეთზე ზეწოლის საკითხი და ის, თუ რა შეიძლება გაკეთდეს პარტნიორებთან ერთად ტარიფებისა და სანქციების პოლიტიკის მხრივ, რათა არსებობდეს შესაძლებლობა, რაც შეიძლება მალე შეხვდნენ ლიდერების დონეზე და დაასრულონ ომი.
„ლიდერების სამმხრივი ფორმატი უდავოდ ყველაზე ეფექტიანია“, - აღნიშნა ზელენსკიმ.
„ასევე განვიხილეთ გატაცებული უკრაინელი ბავშვების დაბრუნების საკითხი, ამ მიმართულებით საერთაშორისო თანამშრომლობა და ის პირობები, რომელშიც ჩვენი ბავშვები იმყოფებიან“, - აღნიშნა ზელენსკიმ.
„ჩვენ ასევე ვემზადებით ნიუ-იორკში გაერო-ს გენერალური ასამბლეის 80-ე სესიისთვის. ჩვენ განვიხილეთ დაგეგმილი ღონისძიებები, უკრაინასა და ამერიკას შორის კოორდინაცია და „მსურველთ კოალიციის“ ფარგლებში მუშაობა. ჩვენ ვმუშაობთ პოტენციურ შეხვედრებსა და სხვადასხვა ფორმატებზე“, - განაცხადა ზელენსკიმ.
