კონსერვატორი კომენტატორის, ჩარლი კირკის მკვლელობა არის შემზარავი, დასაგმობი ფაქტი. აქედან ჩანს, საითკენ მიაქანებენ ე.წ. ლიბერალები, ფსევდოლიბერალები თანამედროვე სამყაროს, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.
„ეს არის შემზარავი, დასაგმობი ფაქტი. აქედან ჩანს, საითკენ მიაქანებენ ე.წ. ლიბერალები, ფსევდოლიბერალები თანამედროვე სამყაროს. ეს არის შემაშფოთებელი, კატასტროფული ტენდენციები, ამის გამოხატულება იყო სხვათა შორის ის აქცია, რომელიც გამართეს სახედაკარგულმა ლიბერალმა აქტივისტებმა ჩვენი შტაბის წინ. აბსოლუტურად სახედაკარგული ადამიანები, ქალი ქალს არ ჰგავდა, კაცი კაცს არ ჰგავს. ტრაგიკულია ის მდგომარეობა, რომელშიც არიან კონკრეტული ადამიანები, უცხოური დაფინანსებით კონკრეტული იდეოლოგიით. ასეთ სახემდე მიიყვანეს ეს ადამიანები, რაც ნამდვილად ტრაგიკული მოვლენაა. მედიაში გავრცელდა ინფორმაცია იმასთან დაკავშირებით, როგორ გამოეხმაურნენ „ნაცი“ აქტივისტები, მათ შორის ე.წ. პოლიტიკოსები თუ როგორც არის, ამ მკვლელობას, რომელიც ვიხილეთ აშშ-ში. მათ შორის იყო გვარამიას პარტიის ერთ-ერთი „თვალსაჩინო“ წევრი, მგონი, ათეულში იყო დასახელებული ფარჯიანი, რომელიც ასევე კაცს არ ჰგავს, რომ შეხედავ. გარეგნობაზე კი არ მაქვს საუბარი, საუბარი მაქვს იმაზე, რა სულიერ მდგომარეობამდე მიიყვანეს ეს ადამიანები, რაც შემდეგ მათ გარეგნობაშიც გამოიხატება და გარეგნობაზეც აისახება. კაცი პირდაპირ, არც მეტი არც ნაკლები, სიცილით შეხვდა ამერიკელი აქტივისტის მკვლელობას. ეს ყველაფერი სამარცხვინოა. აქედან ჩანს ერთი მარტივი რამ, „ნაცი“ არის მკვლელი და „ნაცი“ არის ბნელი.
ფარჯიანი, ნათია ჭკუასელი და ასე შემდეგ, რამდენიმე გვარი იყო გაჟღერებული, რომელიც სიცილით და დაცინვით შეხვდა ამ მკვლელობას. მათ შორის იქ იყვნენ კომენტარების ავტორები, რომლებიც კონკრეტულ სახედაკარგული ადამიანების აქციაში მონაწილეობდა. ეს ყველაფერი შეგვახსენებს, რომ „ნაცი“ არის მკვლელი და „ნაცი“ არის ბნელი. „ნაცში“ ვგულისხმობ ყველა უცხოელ აგენტს, ყველა გარედან დაფინანსებულ აქტივისტს, ყველა „ტიტუშკას“, რომელიც იყო ჩვენს შტაბთან მისული. ესენი არიან „ნაცები“, „ნაცი“ არის მკვლელი, „ნაცი“ არის ბნელი. ჩვენ ვატარებდით სოციოლიგიურ კვლევებს. ერთ საინტერესო რამეზე უნდა გავამახვილო ყურადღება, თავიდან გვიკვირდა, როგორ არ იციან კონკრეტულმა ადამიანებმა, რომ „ნაცები“ იყვნენ მკვლელები, სჩადიოდნენ უამრავ მკვლელობას და ასე შემდეგ. ყველამ ყველაფერი იცის. სოციოლოგიურმა ჯგუფებმა, ე.წ. ფოკუს ჯგუფებმა დაადასტურა, რომ „ნაცებმა“ იციან, რომ „ნაცები“ არიან მკვლელები, მაგრამ მაინც უჭერენ მათ მხარს – რატომ? რადგან „ნაცი“ თავისთავად არის მკვლელი და მკვლელიც იმიტომ არის, რომ არის ბნელი“, – განაცხადა ირაკლი კობახიძემ.
