„პარი სენ-ჟერმენმა“ 28-ე ტურში „ანჟერს“ უმასპინძლა, მატჩი ანგარიშით 1:0 მოიგო და ქვეყნის ჩემპიონის ტიტული ზედიზედ მეოთხედ, ისტორიაში კი მეცამეტედ მოიპოვა  

ხვიჩა კვარაცხელიამ „ანჟერთან“ საგოლე გადაცემა შეასრულა.

საფრანგეთის ლიგა 1-ის 28-ე ტურში პარიზელებს ჩემპიონობისთვის ქულაც ჰყოფნიდათ.

ანგარიში 55-ე წუთზე კვარაცხელიას გადაცემით გავიდა – ხვიჩამ მცველს ბურთი აართვა და საჯარიმოში დეზირე დუე მონახა, რომელმაც თავური დარტყმით პსჟ დააწინაურა.

ანგარიში აღარ შეცვლილა და პსჟ საფრანგეთის ჩემპიონი მეცამეტედ გახდა, ხოლო ხვიჩა კვარაცხელია პირველი ქართველი ფეხბურთელია, რომელიც ტოპ 5 ლიგიდან ორის (იტალია, საფრანგეთი) ჩემპიონი გახდა.

ხვიჩასთვის ეს პროფესიონალურ საკლუბო კარიერაში მესამე მოგებული ტიტულია. მან 2018-2019 წლების სეზონში მოსკოვის ლოკომოტივთან ერთად რუსეთის თასი მოიგო, ნაპოლისთან ერთად კი 2022-2023 წლების სერია A-ს გამარჯვებული გახდა, რასაც წელს ლიგა 1-ში ჩემპიონობა დაუმატა.

ხვიჩა კვარაცხელია, რომელიც პარი სენ-ჟერმენში ნაპოლიდან ზამთარში გადავიდა, ლიგა 1-ის 10 შეხვედრაში ითამაშა, გაიტანა 2 გოლი და მიითვალა 3 საგოლე პასი.