აჭარის ავტონომიური რესპუბლიკის მთავრობის თავმჯდომარის თანამდებობაზე სულხან თამაზაშვილის კანდიდატურა დასახელდა.
სულხან თამაზაშვილის კანდიდატურა პრეზიდენტის სასახლეში საქართველოს პრეზიდენტმა, მიხეილ ყაველაშვილმა და პრემიერ-მინისტრმა, ირაკლი კობახიძემ დაასახელეს.
თამაზაშვილი თორნიკე რიჟვაძეს ჩაანაცვლებს, რომელიც აჭარის მთავრობის ხელმძღვანელის პოზიციიდან 7 წლის შემდეგ, 2025 წლის 4 აპრილს გადადგა.
„აჭარის ავტონომიური რესპუბლიკის მთავრობის თავმჯდომარის თანამდებობაზე დასამტკიცებლად უმაღლეს საბჭოს სულხან თამაზაშვილის კანდიდატურა წარვუდგინე. აღნიშნული გადაწყვეტილება აჭარის უმაღლეს საბჭოში წარდგენილ პოლიტიკურ სუბიექტებთან კონსულტაციისა და საქართველოს პრემიერ-მინისტრის თანახელმოწერის საფუძველზე მივიღე. სულხან თამაზაშვილი გახლავთ პოლიციის პოლკოვნიკი. მას შსს-ში მუშაობის მრავალწლიანი გამოცდილება აქვს, მათ შორის, ის უწყების სხვადასხვა დეპარტამენტში ხელმძღვანელ პოზიციებს იკავებდა, სადაც ღირსეულად და წარმატებით უძღვებოდა დაკისრებულ მოვალეობებს. სწორედ ამიტომ ბატონ სულხანს მიღებული აქვს არაერთი დამსახურებული ჯილდო. კანონიერების და მართლწესრიგის განმტკიცების საქმეში შეტანილი განსაკუთრებული წვლილისთვის, ახლო წარსულში, შსს-ს სხვა ხელძღვანელ პირებთან ერთად, ღირსების ორდენით დავაჯილდოე. აღსანიშნავია, რომ სულხან თამაზაშვილი აჭარის რეგიონშია დაბადებული და გაზრდილი, შესაბამისად, კარგად იცნობს აჭარის მხარეს. დარწმუნებული ვარ, აჭარის ავტონომიური რესპუბლიკის მთავრობის თავმჯდომარის პოსტზეც ისეთივე წარმატებული იქნება, როგორც წლების განმავლობაში ძალოვან სისტემაში მუშაობის დროს იყო. ბატონ სულხანს წარმატებას ვუსურვებ, მას და მის გუნდს ჩემი, როგორც საქართველოს პრეზიდენტის მხრიდან, სრული თანადგომა და მხარდაჭერა ექნება“, – განაცხადა მიხეილ ყაველაშვილმა.
აქამდე თამაზაშვილი თბილისის პოლიციის დეპარტამენტის დირექტორის პოზიციას იკავებდა. თამაზაშვილი ბრიტანეთის მიერ არის სანქცირებული.
2024 წლის 19 დეკემბერს შსს-ს მაღალჩინოსნები, შს მინისტრი ვახტანგ გომელაური, შს მინისტრის მოადგილე ალექსანდრე დარახველიძე, თბილისის პოლიციის დეპარტამენტის დირექტორი სულხან თამაზაშვილი, გდდ-ს ხელმძღვანელი ზვიად ხარაზიშვილი, იგივე "ხარება" და ხარაზიშვილის მოადგილე მილერი ლაგაზაური დიდმა ბრიტანეთმა, მათ შორის, საპროტესტო აქციების ძალადობრივი დაშლის გამო დაასანქცირა.
