ოპოზიციონერი პოლიტიკოსი კახა ოქრიაშვილი განცხადებას ავრცელებს და გერმანიაში ჩატარებულ არჩევნებს აფასებს.
მისი თქმით, ფრიდრიხ მერცი სწრაფი და ხისტი გადაწყვეტილებების მიმღებ პოლიტიკოსად ითვლება, რომელიც მხარს უკრაინის უფრო ფართომასშტაბიან სამხედრო დახმარებას და რუსეთის მიმართ უფრო მკაცრი ზომების გატარების მომხრეა.
ოპოზიციონერი პოლიტიკოსი პარალელს ქართულ რეალობაზე ავლებს და ახალი არჩევნების აუცილებლობაზე ამახვილებს ყურადღებას: დიახაც, არ იქნება სამართალი და სამართლიანი არჩევნები, არ იქნება მშვიდობა!
"გერმანიაში დასრულდა საპარლამენტო არჩევნები და როგორც მოსალოდნელი იყო, ფრიდრიხ მერცის ბლოკმა გაიმარჯვა. მერცი სწრაფი და ხისტი გადაწყვეტილებების მიმღებ პოლიტიკოსად ითვლება, რომელიც მხარს უკრაინის უფრო ფართომასშტაბიან სამხედრო დახმარებას და რუსეთის მიმართ უფრო მკაცრი ზომების გატარების მომხრეა. თუმცა დღეს ეს მთავარი თემა არ არის. მსურს, ყურადღება გავამახვილო იმ ფაქტზე, რომ ფაქტობრვიად ყველა ეგზიტპოლის მონაცემი დაემთხვა ერთმანეთს და შედეგს. დამარცხებულმა კი გამარჯვებულს მიულოცა. აი, რას ნიშნავს ნამდვილი, დემოკრატიული არჩევნები.
ჩვენს შემთხვევაში, საერთაშორისო ორგანიზაციების ეგზიტპოლები 40,9%-დან 42%-მდე მერყეობდა, ხოლო „ოცნებამ“ 53,9 % დაიწერა, ანუ 13 %-ით მეტი, ვიდრე რეალურად თავის მოსყიდვა-დაშინება-მიყვანის ორგანიზებიანად აიღო. ჯამში, 4-მა ოპოზიციურმა პარტიამ „ოცნებაზე“ მეტი ხმა მოიპოვა და რეალურად, გაიმარჯვა კიდეც. ეგზიტპოლები არ არის ერთადერთი სიმპტომი იმისა, რომ საპარლამენტო არჩევნები გაყალბდა - ამის შესახებ ჩვენ ყველამ ვიცით და ეს ეუთო-ს, ოდირი-სა და სხვა საერთაშორისო ორგანიზაციების დასკვნებშიც აღნიშნულია. „ოცნება“ არის დე-ფაქტო ხელისუფლება, რომელიც ძალისმიერად და უკანონოდ ინარჩუნებს მმართველობას, რომელიც მას არ ეკუთვნის.
პოლიტიკოსები, ექსპერტები და ყველა, ვისაც არ ეზარება, საუბრობს პოლარიზაციაზე, საზოგადოების გახლეჩაზე და იმაზე, რომ აუცილებელია კონსენსუსი. ამისთვის კი იდეალური ვარიანტია, როცა ერი, ბერი და მთელი პოლიტიკური სპექტრი თანხმდება მთავარ საკითხებზე. და როგორ მიიღწევა ეს კონსენსუსი?! ერთადერთი გზა ერთსულოვნებისკენ, ანუ გაერთიანებისკენ არამარტო ჩვენთან, არამედ ყველა ქვეყანაში, არის ზედმიწევნით სამართლიანი არჩევნები.
ჩვენნაირი პატარა ერისთვის გადარჩენის ერთადერთი გზა გაერთიანებაა, რათა შევძლოთ, ვიყოთ კონკურენტუნარიანი და დავიცვათ ჩვენი ინტერესები არამარტო გლობალურ მოთამაშეებთან, არამედ მეზობელ ქვეყნებთანაც. როცა ხარ შეკრული ერი, დიდი სახელმწიფოებიც გიწევენ ანგარიშს.
სამართლიანია არჩევნები, როცა ეგზიტპოლი ემთხვევა შედეგებს, დამარცხებული ულოცავს გამარჯვებულს და არც ოპოზიციას აქვს პრეტენზია. სამართლიანი არჩევნები მუდმივად იწვევს ხელისუფლების ცვლილებას.
დასკვნა - რაც მე და მთელს ჩვენს ერს სურს, ეს საქართველოს წინსვლა და გამარჯვებაა. ამას ვერ მივაღწევთ ერთიანობის გარეშე და ერთიანობა ვერასდროს იქნება, თუ არ ჩატარდება სამართლიანი არჩევნები. დიახაც, არ იქნება სამართალი და სამართლიანი არჩევნები, არ იქნება მშვიდობა!“ - აცხადებს კახა ოქრიაშვილი.
