მოსკოვი შეშფოთებულია უკრაინაში ნატო-ს ქვეყნებიs სამხედრო კონტიგენტების შესაძლო განლაგების გამო, ამის შესახებ რუსეთის პრეზიდენტის პრესმდივანმა დიმიტრი პესკოვმა ბრიფინგზე განაცხადა.
„ჩვენ, რა თქმა უნდა, ყველაზე ყურადღებით ვაკვირდებით ყველა ამ ინფორმაციას, ვადევნებთ თვალს ამ საკითხზე ევროპელების ხანდახან ურთიერთსაწინააღმდეგო ოფიციალურ განცხადებას.
ეს ჩვენთვის შემაშფოთებელია, რადგან ჩვენ ვსაუბრობთ სამხედრო კონტიგენტების გაგზავნაზე, ნატო-ს ქვეყნების სამხედრო კონტიგენტების შესაძლო, საბოლოო გაგზავნაზე უკრაინაში“, - განაცხადა მან.
ასე გამოეხმაურა პესკოვი ბრიტანეთის პრემიერ-მინისტრის კირ სტარმერის განზრახვას, მომავალ კვირას წარუდგინოს აშშ-ოს პრეზიდენტ დონალდ ტრამპს უკრაინაში ევროპის ქვეყნებიდან 30 000-მდე სამშვიდობო კონტინგენტის განლაგების გეგმა.
პესკოვის თქმით, „ეს სრულიად განსხვავებულ მნიშვნელობას იძენს“ რუსეთის უსაფრთხოების თვალსაზრისით.
„აქედან გამომდინარე, ეს თემა ჩვენთვის ძალიან აქტუალურია, ჩვენ ამას ძალიან ყურადღებით ვაკვირდებით.
მინდა შეგახსენოთ ჩვენი საგარეო საქმეთა მინისტრის სიტყვები, რომ, რა თქმა უნდა, უკრაინის ტერიტორიაზე ნატო-ს წევრი ქვეყნების სამხედრო კონტიგენტების განლაგება ჩვენთვის მიუღებელია“, - განაცხადა პესკოვმა.
