რომის პაპი ფრანცისკე რომის ჰოსპიტალ „ჯემელიში“ გადაიყვანეს. ამის შესახებ BBC წმინდა საყდრის ოფიციალურ განცხადებაზე დაყრდნობით იუწყება.
88 წლის პონტიფიკოსი 14 თებერვალს ბრონქიტის გართულებით საავადმყოფოში გადაიყვანეს. 17 თებერვალს მისი მდგომარეობა გაუარესდა, სასუნთქი გზების პოლიმიკრობული ინფექცია დაუდგინდა, რაც მოითხოვდა მისი მკურნალობის შეცვლას „კომპლექსური კლინიკური სიტუაციის“ გამოსასწორებლად.
ვატიკანის განცხადებაში ნათქვამია, რომ რომის პაპი ფრანცისკე საავადმყოფოში დარჩება მანამდე, ვიდრე საჭირო იქნება.
მას სრული დასვენება ურჩიეს, რის გამოც 16 თებერვალს, კვირას, ტრადიციული ყოველკვირეული ლოცვის აღსრულება ვერ შეძლო.
წმინდა საყდრის პრესსპიკერმა მატეო ბრუნიმ განაცხადა, რომ პონტიფიკოსი კარგ განწყობას ინარჩუნებს.
