უნგრეთის პრემიერ-მინისტრმა ვიქტორ ორბანმა განაცხადა, რომ უკრაინაში მიმდინარე ომი შესაძლოა, გახდეს ევროკავშირისთვის ისეთივე დამღლელი და უიმედო ოპერაცია, როგორც აშშ-ისთვის იყო ომი ავღანეთში, საიდანაც "გამოსავალი არ არის".
ორბანის განცხადებით, ევროკავშირმა უკვე დახარჯა ასობით მილიარდი ევრო უკრაინის მხარდასაჭერად და თუ სიტუაცია არ შეიცვლება, ომი ევროპის ქვეყნებისთვის გაჭიანურებული ტვირთი გახდება.
„თუ პრეზიდენტი ტრამპი ვერ იპოვის გამოსავალს, ეს ომი შესაძლოა, გახდეს ევროკავშირის ავღანეთი“, - თქვა ორბანმა და უკრაინაში ვითარება ავღანეთში აშშ-ის 20-წლიან სამხედრო ოპერაციას შეადარა.
"გაუთავებელი ომი, გაუთავებელი კონფლიქტი, საიდანაც გამოსავალი არ არის, რომელიც ითხოვს ენერგიას, ადამიანის სიცოცხლეს, ფულს, ყველაფერს. ეს ანგრევს ევროკავშირის ნორმალურ ცხოვრების ჩარჩოებს. ... ჩვენ სერიოზული საფრთხის წინაშე ვართ”, - თქვა ორბანმა.
უნგრეთის პრემიერ-მინისტრმა ასევე გაიმეორა კრემლის ნარატივი, რომ რუსეთმა დაიწყო ომი უკრაინის ნატო-ში გაწევრიანების თავიდან ასაცილებლად. მან ასევე განაცხადა, რომ ბრძოლის ველზე ვითარება რუსეთის სასარგებლოდ ვითარდება.
„სირთულე არის ის, თუ როგორ უნდა დაარწმუნო რუსეთი, შეაჩეროს ომი, როცა რუსები იგებენ“, - განაცხადა ორბანმა.
