"ქრისტიან-დემოკრატიულმა მოძრაობამ" ძალოვანი სტრუქტურების პენსიონერთა და ვეტერანთა კომიტეტი შექმნა, რომელსაც სამაჩაბლოსა და აფხაზეთის ომის ვეტერანი ნოდარ ცოტნიაშვილი უხელმძღვანელებს.
"გადაწყვეტილება კომიტეტის შექმნის შესახებ ემსახურება იმას, რომ ბრძოლა ვეტერანთა პრობლემების მოსაგვარებლად კიდევ უფრო აქტიურად წარიმართოს", - აღნიშნა დღეს გამართულ პრესკონფერენაციაზე პარტიის ერთ-ერთმა ლიდერმა გიორგი ახვლედიანმა.
მისი თქმით, "ქრისტიან-დემოკრატები" დაარსების პირველი დღეებიდანვე აქტიურად მუშაობენ იმ პრობლემების მოგვარებაზე, რაც ძალოვანი სტრუქტურების 50 ათასამდე პენსიონერს და ვეტერანს უკავშირდება.
"ამ კუთხით ჩვენთან ერთად, ყველა სამუშაოში აქტიურად იყვნენ ჩართული თავად ვეტერანები. შეიქმნა ორი საკანონმდებლო ინიციატივა, რომელიც დიდი ხანია შეტანილია პარლამენტში და ვითხოვთ, საგაზაფხულო სესიის დაწყებისთანავე საპარლამენტო უმრავლესობამ ბოლოს და ბოლოს მოიცალოს და ამ ინიციატივების განხილვა შესაბამის კომიტეტებში დაიწყოს", - აღნიშნა ახვლედიანმა.
მისი განმარტებით, საკანონმდებლო ინიციატივები ვეტერანთათვის ხუთი წლის წინ გაუქმებული შეღავათების აღდგენასა და კანონში ძალოვანი სტრუქტურების პენსიონერთათვის პენსიის გადაანგარიშების მუხლის აღდგენას ითვალისწინებს.
"ეს სწორედ ის მოთხოვნებია, რამაც ვეტერანები პროტესტის უკიდურეს ფორმამდე - შიმშილობამდე მიიყვანა, რასაც ხელისუფლებამ ჩვეული ძალადობით უპასუხა და 3 იანვარს მორიგი დანაშაული ჩაიდინა", - აღნიშნა ახვლედიანმა.
