გერმანიის კანცლერმა ოლაფ შოლცმა ისრაელში ვიზიტისას კიდევ ერთხელ მოუწოდა ცეცხლის ხანგრძლივი შეწყვეტის და ჰამასის მიერ გატაცებული მძევლების გათავისუფლებისკენ.
ამის შესახებ შოლცმა იერუსალიმში ისრაელის პრემიერ-მინისტრ ბენიამინ ნეთანიაჰუსთან ერთობლივ პრესკონფერენციაზე განაცხადა.
”ჩვენ გვჭირდება შეთანხმება მძევლების გათავისუფლების შესახებ გრძელვადიანი ცეცხლის შეწყვეტით,” - თქვა შოლცმა.
„ჩვენ გვესმის მძევლების ოჯახების, რომლებიც ხუთ თვეზე მეტი ხნის შემდეგ ამბობენ: „დადგა დრო მძევლების გათავისუფლების ყოვლისმომცველი შეთანხმებისა, რათა გადავარჩინოთ ისინი, ვინც ჯერ კიდევ ტყვეობაშია“, - დასძინა გერმანიის კანცლერმა.
მანამდე, იორდანიის მეფესთან მოლაპარაკებების დროს, შოლცმა ასევე ხაზგასმით აღნიშნა, რომ ისრაელის შეტევა რაფაჰზე "ძალიან გაართულებს" მშვიდობას რეგიონში.
როგორც ცნობილია, 15 მარტს ისრაელმა დაამტკიცა შეტევითი გეგმა რაფაჰში, სადაც ღაზის 2,3 მილიონი მოსახლეობიდან ნახევარზე მეტმა შეაფარა თავი ომის დაწყების შემდეგ.
