სასჯელაღსრულების, პრობაციისა და იურიდიული დახმარების საკითხთა მინისტრმა ხათუნა კალმახელიძემ წლის შემაჯამებელი ანგარიში წარადგინა.
დღეს გამართულ ბრიფინგზე უწყების ხელმძღვანელმა ისაუბრა როგორც პენიტენციალურ სისტემაში, ისე პრობაციისა და იურიდიული დახმარების კუთხით მიღწეულ წარმატებებზე.
"გაიხსნა სამი ახალი დასავლული სტანდარტების შესაბამისი დაწესებულება. ძველ დაწესებულებებში კი გაუმჯობესდა ინფრასტრუქტურა და სამედიცინო ხარისხი. მაგალითისთვის, წელს 14 579 მსჯავრდებულს ჩაუტარდა სტომატოლოგიური მკურნალობა", - აღნიშნა კალმახელიძემ.
მინისტრი პენიტენციალურ სისტემაში განხორციელებულ რეფორმებს შორის ტუბერკოლუზით დაავადებულთა სამკურნალო პუნქტის გახსნას და გრძელვადიანი პაემნებისთვის საჭირო ინფრასტრუქტურულ სამუშაოებსაც გამოყოფს, რომელიც სამ დაწესებულებაში უკვე დასრულებულია.
"გარდა ამისა რუსთავის მე-12 დაწესებულებაში დაინერგა გათავისუფლებისთვის მომზადების პილოტური პროგრამა. არასრულწლოვანთა დაწესებულებაში გაუმჯობესდა ინფრასტრუქტურა და არასრულწლოვანთა მართლმსაჯულების ფარგლებში დაინერგა ინდივიდუალური მიდგომის პროგრამა. ამასთან, პენიტენციალურ სისტემაში გაფართოვდა დასაქმების პერსპექტივები", - დასძინა მინისტრმა.
რაც შეეხება პრობაციის სამსახურის მუშაობას, კალმახელიძე პრობაციის 65 ოფისის გარემონტებასა და აღჭურვას მნიშვნელოვანს უწოდებს.
მინისტრი დადებითად აფასებს იურიდიული დახმარების სამსახურის მუშაობასაც და აღნიშნავს, რომ წელს უფასო იურიდიული დახმარების ხარისხი და ხელმისაწვდომობა გაიზარდა.
"შეიქმნა სპეციალური საბჭო, რომელიც ამ სამსახურის ეფექტურად მუშაობას შეუწყობს ხელს. მაგალითისთვის, წელს უფასო იურიდიული დახმარებით 24 587-მა ადამიანმა ისარგებლა", - განმარტა კალმახელიძემ.
