ევროკავშირში გაწევრიანება არის დამსახურებაზე დაფუძნებული პროცესი, არ არსებობს არანაირი მოკლე გზა, არანაირი გადახვევა, არსებობს პოლიტიკური ნება, პოლიტიკური დეკლარაცია, რომელიც შედეგებში გადაიზრდება და მხოლოდ ხილვადი, ხელმისაწვდომი, ხელშესახები შედეგები განაპირობებს ამ გზაზე წინსვლას, – ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა ჟოზეპ ბორელმა განაცხადა.
როგორც მან აღნიშნა, საქართველო არის ერთ-ერთი უმჭიდროესი პარტნიორი და თანამშრომელი ქვეყანა.
„მიხარია, რომ ვმასპინძლობ საქართველოს პრემიერ-მინისტრ ირაკლი ღარიბაშვილს ასოცირების საბჭოს სხდომაზე. საქართველო არის ჩვენი ერთ-ერთი უმჭიდროესი პარტნიორი და თანამშრომელი ქვეყანა. ეს განსაკუთრებული შეხვედრაა, რადგან ევროკავშირის ლიდერების მიერ საქართველოს ევროკავშირის პერსპექტივის აღიარების შემდეგ, ასეთი მაღალი დონის შეხვედრა პირველად იმართება და ნამდვილად ადასტურებს იმას, რომ ევროკავშირს აქვს ნაკისრი ვალდებულება, კიდევ უფრო გააძლიეროს ჩვენი ურთიერთობები და საქართველოს ამბიციები გაამართლოს, თუმცაღა ეს ამბიციები, როგორც ყოველთვის მომდინარეობს და მოდის თავისი პასუხისმგებლობით, ეს პასუხისმგებლობა არის უპირველეს ყოვლისა რეფორმების გაგრძელება, განსაკუთრებით იმ 12 პრიორიტეტის მიმართ, რომელიც გამოვლენილი იქნა ევროკომისიის მიერ. მეორე პასუხისმგებლობა მომდინარეობს იქიდან, რომ შესუსტდეს პოლარიზაცია მთელს ამ პოლიტიკურ სპექტრში და აქცენტი გაკეთდეს ყველას საერთო ძალისხმევაზე, რათა გაცხადებული მიზანი იქნას შესრულებული, ეს არამარტო მთავრობამ უნდა შეასრულოს, არამედ მთელმა პოლიტიკურმა სპექტრმა და მთელმა საზოგადოებამ.
ნება მიბოძეთ შეგახსენოთ, რომ ევროკავშირში გაწევრიანება არის დამსახურებაზე დაფუძნებული პროცესი, არ არსებობს არანაირი მოკლე გზა, არანაირი გადახვევა, არსებობს პოლიტიკური ნება, პოლიტიკური დეკლარაცია, რომელიც შედეგებში გადაიზრდება და მხოლოდ ხილვადი, ხელმისაწვდომი და ხელშესახები შედეგები განაპირობებს ამ გზაზე წინსვლას.
პერსპექტივა ძალიან ნათელია, როდესაც საუბარია ისეთ საკითხებზე, როგორც არის პოლიტიკური კულტურა, ინკლუზიურობა, დემოკრატიის პრინციპები, სამართლის უზენაესობის, სასამართლოს დამოუკიდებლობის, მედიის თავისუფლების პრინციპები, ეს ყველაფერი ჩვენი საფუძემდებლო პრინციპებია“, – განაცხადა ბორელმა.
