ეკონომიკისა და მდგრადი განვითარების სამინისტრო შპს "საქართველოს ფოსტის" გაყიდვის მიზნით, ინტერესთა გამოხატვის მიღებას იწყებს, რომელიც 20 დეკემბერს დასრულდება.
სამინისტროს ინფორაციით, საქართველოს მთავრობა მზადაა განიხილოს სხვადასხვა შემოთავაზება პოტენციური მყიდველების მხრიდან კომპანიის სამომავლო განვითარების შესახებ.
დაინტერესებულმა მხარეებმა უნდა წარადგინონ მოკლე აღწერა, თუ როგორ ხედავენ კომპანიის სამომავლო მოღვაწეობას, თავისი ძირითადი (საფოსტო სერვისი) პროფილის შენარჩუნებით. დაინტერესებულმა პირებმა უნდა მოგვაწოდონ ინფორმაცია მათი კომპანიის ოფიციალური სახელწოდების, მისამართის, საკონტაქტო პირის, აღნიშნულ სფეროში მოღვაწეობის გამოცდილებისა და ძირითადი ფინანსური მაჩვენებლების შესახებ.
ამ დროისათვის "საქართველოს ფოსტა" 100% სახელმწიფოს მფლობელობაშია და კომპანიას აქვს ყველაზე სანდო საფოსტო მომსახურების გაწევის იმიჯი. მისი ოფისები მთელი ქვეყნის ტერიტორიაზეა განლაგებული.
ამ მახასიათებლების გათვალისწინებით შპს "საქართველოს ფოსტა" საუკეთესო ინვესტირების საშუალებას იძლევა.
შპს "საქართველოს ფოსტა" ქართულ საფოსტო ბაზარზე მთავარი საფოსტო ოპერატორია. კომპანია ოპერირებს მთელი ქვეყნის მასშტაბით და ფლობს დაახლოებით 87 000 კვ.მ. მიწას და შენობებს საერთო ფართით 100 000 კვ.მ.