უკრაინის ყოფილი პრეზიდენტი, სახელმწიფო ღალატში ბრალდებული, კრემლის ემისარი ვიქტორ იანუკოვიჩი უკრაინის პრეზიდენტ ვოლოდიმირ ზელენსკის მიმართავს და მოუწოდებს, "ნებისმიერ ფასად შეაჩეროს სისხლისღვრა" და "მიაღწიოს სამშვიდობო შეთანხმებას".
"მე კარგად მესმის, რომ ბევრი "მრჩეველი" გყავთ, მაგრამ პირადად თქვენ ხართ ვალდებული ნებისმიერ ფასად შეაჩეროთ სისხლისღვრა და მიაღწიოთ სამშვიდობო შეთანხმებას. ეს არის ის, რასაც თქვენგან მოელიან უკრაინაში, დონბასსა და რუსეთში", - ნათქვამია მიმართვაში, რომლის ტექსტსაც კრემლის სააგენტო "რია ნოვოსტი" ავრცელებს.
აღსანიშნავია, რომ ტექსტში სახელმწიფო ღალატში მხილებული იანუკოვიჩი დონბასს უკრაინისგან განცალკევებით მოიხსენიებს.
იანუკოვიჩი მიმართვაში წერს, რომ "უკრაინელი ხალხი და დასავლეთში კიევის პარტნიორები მადლიერები იქნებიან [პრეზიდენტ ზელენსკის] ასეთი ნაბიჯით".
ყოფილი პრეზიდენტის თქმით, ტკივილის აყენებს იმის ხილვა, რაც მის სამშობლოში ხდება.
"ნებისმიერ ტრაგედიაში არის მომენტი, როცა მისი შეჩერება ჯერ კიდევ შესაძლებელია", - დასძენს იანუკოვიჩი.
ვიქტორ იანუკოვიჩი უკრაინის პრეზიდენტის თანამდებობას 2010-2014 წლებში იკავებდა. მას შემდეგ, რაც შეეცადა უკრაინის ევროინტეგრაციის ხელშეშლას, ქვეყანაში მასობრივი საპროტესტო აქციები დაიწყო. მოსახლეობის საპროტესტო მღელვარებას იანუკოვიჩი ძალით დაუპირისპირდა, რასაც ათეულობით მოქალაქე ემსხვერპლა. "ღირსების რევოლუციის" სახელით ცნობილი მოვლენების შემდეგ, იანუკოვიჩმა უკრაინა დატოვა და თავი რუსეთს შეაფარა.
რუსეთის უკრაინაში შეჭრამდე და მას შემდეგ, ვრცელდება ცნობები, რომ კრელმს უკრაინაში ვიქტორ იანუკოვიჩის თანამდებობაზე აღდგენა აქვს განზრახული.
