ფინანსთა სამინისტროს მომსახურების სააგენტოს ქონების ლიზინგის წესით განკარგვის უფლება ეძლევა. კახა ბაინდურაშვილის უწყების მიერ მომზადებული საკანონმდებლო ინიციატივის თანახმად, ცვლილება "სახელმწიფო ქონების შესახებ" კანონში შევა. ახალ საკანონმდებლო ინიციატივაზე პარლამენტში მსჯელობა მომავალი კვირიდან დაიწყება. როგორც სააგენტო "ჯი-ეიჩ-ენთან" საუბრისას ფინანსთა სამინისტროს მომსახურების სააგენტოს ხელმძღვანელი გრიგოლ ბაიბურთი განმარტავს, ეკონომიკური თვალსაზრისით ლიზინგი არის ერთგვარი კრედიტი.
"ჩვენ იჯარის მივცემთ ადამიანს რაღაც ქონებას, რომელიც შემდგომ მის შეძენას შეძლებს. ცვლილება ხორციელდება იმიტომ, რომ მომხმარებელს ჩვენგან ქონების შესყიდვა გავუმარტივოთ. ასეთ ვითარებაში მსოფლიო პრაქტიკა არსებობს იჯარის სახით, ანუ არსებობს რამოდენიმე სახის იჯარის ხელშეკრულება მოკლევადიანი, საშუალოვადიანი და გრძელვადიანი. ჩვენ გრძელვადიან საიჯარო ხელშეკრულებაზე შევჩერდით, რომელიც 3-დან 4 წლამდე განისზღვრება, რითაც ძირითადად ძვირადღირებული ქონების, ქარხნებისა და ძვირადღირებული საწარმოო დანადგარების განკარგვას ვაპირებთ. მიგვავაჩნია, რომ ამ სერვისის დანერგვით, მეწარმე სუბიექტებს შესაძლებლობა ეძლევათ, სამომავლოდ ეს ქონება შეისყიდონ. მეორეს მხრივ ის საწარმოები, რომელიც ამ ეტაპზე არ მოქმედებს სამომავლოდ ამოქმედდება და ახალი სამუშაო ადგილები გაჩნდება"- აცხადებს გრიგოლ ბაიბურთი.
"სახელმწიფო ქონების შესახებ" კანონში შესატანი ცვლილებების თანახმად, სააგენტოს უფლება ეძლევა სახელმწიფო ქონება ლიზინგის წესით განკარგოს. როგორც სააგენტო "ჯი-ეიჩ-ენს" ფინანსთა სამინისტროში განუცხადეს, აღნიშნული საკანონმდებლო ინიციატივის მიზანია სსიპ ,,საქართველოს ფინანსთა სამინისტროს მომსახურების სააგენტოს~ მიერ სახელმწიფოს საკუთრებაში მიქცეული მოძრავი ქონების განკარგვის ახალი ფორმის - ლიზინგის დანერგვა, სახელმწიფოს საკუთრებაში მიქცეული იმ ქონების განკარგვისათვის, რომელთა საბოლოო რეალიზაციაც ამ ფორმით უფრო ეფექტური იქნება (ამონაგები თანხის მიმართულებით). კანონპროექტი აგრეთვე ითვალისწინებს ქონების რეალიზაციის რამდენიმე ფორმის ერთდროულად გამოყენებას, რაც ინტერნეტ-აუქციონზე გამოტანილი მოძრავი ქონების მომენტალურად (განხვავებული, მაღალი ფასით), ვაჭრობის გარეშე შესყიდვის შესაძლებლობას გულისხმობს, რაც პოტენციურ მყიდველთა მეტ დაინტერესებას გამოიწვევს.
მთავრობის ახალი ინიციატივით, გაჩნდება სახელმწიფოს საკუთრებაში მიქცეული მოძრავი ქონების ეფექტურად განკარგვის ორი ახალი შესაძლებლობა - ლიზინგი და ინტერნეტ-აუქციონის მიმდინარეობის პერიოდში ქონების მომენტალურად, ვაჭრობის გარეშე შესყიდვა.
ფინანსთა სამინისტროს ინფორმაციით, ახალი ინიციატივა ბიუჯეტის საშემოსავლო ნაწილზე იქონიებს გავლენას, რამდენადაც ჩნდება დამატებითი სერვისი სახელმწიფო საკუთრებაში მიქცეული ქონების რეალიზაციისათვის.
"სახელმწიფო ქონების შესახებ" კანონში შესატანი ცვლილების მიხედვით სახელმწიფოს საკუთრებაში მიქცეული მოძრავი ქონების განკარგვის ფორმებია: სახელმწიფოს საკუთრებაში მიქცეული მოძრავი ქონების რეალიზაცია აუქციონის (მათ შორის - ინტერნეტ-აუქციონის) ფორმით; სახელმწიფოს საკუთრებაში მიქცეული მოძრავი ქონების რეალიზაცია პირდაპირი მიყიდვის ფორმით; სახელმწიფოს საკუთრებაში მიქცეული მოძრავი ქონების რეალიზაცია ერთ პირთან მოლაპარაკების საშუალებით; სახელმწიფოს საკუთრებაში მიქცეული მოძრავი ქონების რეალიზაცია სავაჭრო ობიექტების (მათ შორის ინტერნეტ მაღაზიის) საშუალებით; სახელმწიფოს საკუთრებაში მიქცეული მოძრავი ქონების რეალიზაცია მესამე პირის მეშვეობით; სახელმწიფოს საკუთრებაში მიქცეული მოძრავი ქონების განაწილება; სახელმწიფოს საკუთრებაში მიქცეული მოძრავი ქონების განადგურება; სახელმწიფოს საკუთრებაში მიქცეული მოძრავი ქონების ლიზინგის ფორმით გადაცემა.
იმავდროულად გარკვეულ შემთხვევებში, საქართველოს ფინანსთა სამინისტროსთან შეთანხმებით, სააგენტოს გენერალური დირექტორი უფლებამოსილია მიიღოს გადაწყვეტილება ქონების რეალიზაციის ორი, ინტერნეტ-აუქციონისა და ინტერნეტ-მაღაზიის, ფორმის ერთდროულად გამოყენების თაობაზე.
