ქალაქ თბილისის 2011 წლის ბიუჯეტში, სატრანსპორტო ინფრასტრუქტურის განვითარებისთვის 98505,6 ათასი ლარია გამოყოფილი.
2011 წელს იგეგმება გზის საფარის აღდგენითი სამუშაოები. ამ თანხაში გათვალისწინებულია გზის საფარის კაპიტალური შეკეთება (დაახლოებით 575,0 ათასი კვადრატული მეტრი); ასევე სხვადასხვა ქუჩებზე გზის საფარის მოწესრიგება და რეაბილიტირება, გზის საფარის ფრაგმენტული შეკეთება (დაახლოებით 112 ათასი კვადრატული მეტრი), თბილისის სხვადასხვა რაიონში 17 ათას კვადრატულ კილომეტრზე იგეგმება ქვაფენილის შეკეთება; ტროტუარების ადაპტირება ინვალიდებისთვის და სხვა ღონისძიებები.
როგორც ბიუჯეტშია აღნიშნული, ამ სამუშაოებით უნდა მოხდეს ქუჩებისა და მაგისტრალების გატვირთვა ჭარბი სატრანსპორტო ნაკადისგან (განტვირთვა 40 % - ით); დედაქალაქის I, II, და კატეგორიის 95 % -მდე გზების ტექნიკური პარამეტრების (სიმტკიცე, სისწორე, ცვეთა, ხორკლიანობა, სანიაღვრეების) დაკმაყოფილება; არსებული გზების 5 %-ის სწორი და რეგულარული ექსპლოატაცია (ბზარების შევსება, ორმოული შეკეთება, ზედაპირული დამუშავება).
2011 წლის თბილისის ბიუჯეტის მიხედვით, სატრანსპორტო ინფრასტრუქტურის განვითარების მიზანია დედაქალაქში ტრანსპორტის შეუფერხებელი მოძრაობა და რეგულირება; ტრანსპორტის და ქვეითად მოსიარულეთა უსაფრთხო გადაადგილება და მგზავრთა კომფორტული და უსაფრთხო გადაადგილება. პროგრამის მოსალოდნელი შედეგებია: ქალაქის ინფრასტრუქტურის გაუმჯობესება, ავტოსაგზაო შემთხვევის შემცირება, თბილისის სატრანსპორტო და სატრანზიტო გამტარიანობის გაზრდით მიღწეული თვისობრივი ცვლილება და გზების გაუმჯობესების შედეგად მიღებული არაპირდაპირი ეკონომიკური შედეგები.
ბიუჯეტში გაწერილია რეგულირებად ეკონომიკურ სფეროებში (მეტროპოლიტენი და ავტობუსი) ადგილობრივი საქალაქო რეგულარული სამგზავრო გადაყვანისას მომხმარებელთა ეკონომიკური ინტერესების დაცვა. კერძოდ, მუნიციპალური ტრანსპორტის მგზავრებისთვის რეგულარული ტარიფის შენარჩუნება; შეუფერხებელი ფუნქციონირების უზრუნველსაყოფად სატრანსპორტო კომპანიის კაპიტალის ზრდა და სხვა ღონისძიებები.