2011 წელს საშემოსავლო გადასახადისა და სხვა შემოსავლების საპროგნოზო მაჩვენებლები იზრდება, რაც რეგიონის განვითარებისა და ინვესტიციების მოცულობის მნიშვნელოვან ზრდასთანაა დაკავშირებული.

აჭარის კონტროლის პალატის ინფორმაციით, აღნიშნულის გათვალისწინებით წარმოდგენილი პროექტით 2011 წლის საპროგნოზო მაჩვენებლები შედარებულია 2010 წლის საწყის გეგმურ მაჩენებელთან.

"რეალურად კი 2011 წლის საპროგნოზო მაჩვენებლის 2010 წლის 9 თვის შედეგებთან შედარებით აღმოჩნდა, რომ შემცირებულია რენტის სახით მისაღები შემოსავლების, სახელმწიფო სალიცენზიო მოსაკრებლის, სანებართვო მოსაკრებლისა და სახელმწიფო ბაჟის საპროგნოზო მაჩვენებლები. ვფიქრობთ აღნიშნული საკითხი მოითხოვს დამატებით განმარტებას"- ნათქვამია აჭარის კონტროლის პალატის მიერ, აჭარის უმაღლესი საბჭოსათვის გადაგზავნილ დასკვნაში.

აჭარის კონტროლის პალატის ინფორმაციით, რეგიონის 2010 წლის 6 თვის რესპუბლიკური ბიუჯეტის შესრულებასთან დაკავშირებით ჩატარებული აუდიტით დადგენილია, რომ 2010 წლის 6 თვის მონაცემებით შემოსავლების გეგმური პარამეტრის განუსაზღვრელობის პირობებში, შემოსავლები მიღებულია სანებართვო მოსაკრებლის, სახელმწიფო ბაჟისა და საჯარო ინფორმაციის ასლის გადაღების მოსაკრებლის სახით. აღნიშნულ სახეებში საპროგნოზო მაჩვენებლები არც 2011 წლის ბიუჯეტის პროექტითაა გათვალისწინებული.

"ასევე დამატებით განმარტებას მოითხოვს, არაფინანსური აქტივების კლების საპროგნოზო მაჩვენებლის შემცირება. 2011 წლის საპროგნოზო მაჩვენებელი 2010 წლის გეგმურ მაჩვენებელთან შედარებით შემცირებულია 4 მლნ. 600 ათასი ლარით"- განმარტავენ აჭარის კონტროლის პალატაში.

2011 წლისათვის ავტონომიური რესპუბლიკის რესპუბლიკური ბიუჯეტის საპროგნოზო მაჩვენებელი განისაზღვრა 94 მლნ. 800 ათასი ლარის ოდენობით, მათ შორის შემოსავლები 79 მლნ. 800 ათას ლარს, ხოლო არაფინანსური აქტივების კლება 15 მლნ. ლარს შეადგენს.

2011 წელს აჭარაში 2010 წლის საწყის გეგმურ მაჩვენებელთან შედარებით დაფინანსების მოცულობა გაზრდილი აქვთ: სოფლის მეურნეობისა და სატყეო მეურნეობის სფეროს - 208,5 ათასი ლარით; ტურიზმის მრავალმიზნობრივი განვითარების პროექტებს - 1 მლნ. 421 ათას 900 ლარით; ჯანმრთელობის დაცვას - 468,6 ათასი ლარით; განათლებას - 1 მლნ. 242 ათას 800 ლარით.