საქართველოს პრემიერ-მინისტრი ნიკა გილაური ჯანდაცვის მინისტრს იმ საავადმყოფოების მონიტორინგს ავალებს, რომელთა რეაბილიტაციაც მიმდინარეობს.
შესაბამისი დავალება ნიკა გილაურმა სანდრო ურუშაძეს მთავრობის დღევანდელ სხდომაზე მისცა.
"მაქსიმალურად გაააქტიურეთ მონიტორინგის ჯგუფი ყველა მიმართულებით. უნდა შემოწმდეს ის საავადმყოფოები, რომელთა რეაბილიტაცია სახელმწიფო ბიუჯეტიდან ხდება და ისინი, რომლებიც კერძო სექტორის მიერ ფინანსდება" - განაცხადა ნიკა გილაურმა და აქვე ჯანდაცვის მინისტრს 2-3 თვეში საავადმყოფოების რეაბილიტაციებთან დაკავშირებული სამუშაოები ყოველთვიური გრაფიკის გაწერაც მოსთხოვა.
"წლევანდელი წლის მსგავსად ჯანდაცვის სფეროს მომავალ წელსაც დიდი ყურადღება დაეთმობა. მე უკვე რამდენიმე საავადმყოფოში ვიყავი, რომელთა რეაბილიტაციაც სახელმწიფო ბიუჯეტიდან ფინანსდება. იქ მუშაობა კარგად მიდის" - განმარტა გილაურმა.
შეგახსენებთ, რომ სახელმწიფო ბიუჯეტიდან ჟვანიას ბავშვთა კლინიკა და რკინიგზის საავადმყოფოს რეაბილიტაცია ფინანსდება. ამას გარდა, კერძო სექტორის მიერ წარმოებული სამუშაოებით (სადაზღვევო კომპანიების მიერ) 46 სხვადასხვა კლინიკის და სამედიცინო ცენტრის მშენებლობა მიმდინარეობს. გარდა ამისა, რაჭაში აჭარასა და თბილისში კიდევ რამდენიმე სამედიცინო დაწესებულების სარეაბილიტაციო სამუშაოებს საერთაშორისო საფინანსო ორგანიზაციები აფინანსებენ.