საპატრიარქოსთვის ტყის გადაცემის წინააღმდეგ პეტიცია შეიქმნა.
პეტიციას, რომელსაც ამ დროისთვის 2 982 მოქალაქე აწერს ხელს, მას შემდეგ შექიმნა, რაც პარლამენტის გარემოს დაცვის კომიტეტმა მესამე მოსმენით მოიწონა კანონპროექტი "ტყის კოდექსში" შესატანი ცვლილებების შესახებ.
"ჩვენ, საქართველოს მოქალაქეები, მოვითხოვთ საქართველოს პარლამენტმა არ დაუჭიროს მხარი ცვლილებების შეტანას ტყის კოდექსში, რომელიც საპატრიარქოსთვის ეკლესია-მონასტრების მიმდებარედ 20 ჰექტარი ტყის ფართობის გადაცემას ითვალისწინებს.
ეს არღვევს საქართველოს თითოეული მოქალაქის უფლებას და ქმნის სტრატეგიული ბუნებრივი რესურსების მართვის და განაწილების უსამართლო პრაქტიკას", - ნათქვამია პეტიციის ტექსტში.
შეგახსენებთ, რომ გუშინ საქართველოს პარლამენტის გარემოს დაცვის კომიტეტის სხდომაზე, უმრავლესობის დეპუტატებმა ტყის კანონი განიხილეს, რომლის მიხედვითაც ყველა ეკლესიას ირგვლივ მდებარე ტყის 20 ჰექტრის საკუთრებაში გადაცემა შეეძლება.
ცვლილებები ტყის კანონში, რომელსაც სამოქალაქო სექტორი თვეების განმავლობაში აპროტესტებდა, გუშინ მესამე მოსმენით მიიღეს.
კანონპროექტი დასამტკიცებლად პარლამენტის პლენარულ სხდომას წარედგინება.