ვაზიანის საველე საწვრთნელ ბაზაზე, ზურაბ ჟვანიას სახელობის სახელმწიფო ადმინისტრირების სკოლის დირექტორის მოვალეობის შემსრულებელმა, კონსტანტინე სირბილაძემ სავალდებულო სამხედრო სამსახურში მყოფ ეროვნული უმცირესობის 14 წარმომადგენელს სახელმწიფო ენის სწავლების პროგრამის დასრულება მიულოცა და წარმატებულ კურსდამთავრებულებს სერტიფიკატები გადასცა.
“სერტიფიკატები გადავეცით ვაზიანის სამხედრო ბაზაზე სამხედრო სავალდებულო სამსახურში მყოფ საქართველოს მოქალაქეებს, ეროვნებით აზერბაიჯანელ ახალწვეულებს. მათ კარგად არ იციან ქართული ენა. ჩვენ ვცდილობთ სკოლის პედაგოგების დახმარებით კვალიფიკაცია ავუმაღლოთ ქართული ენის ცოდნის კუთხით, რათა შეძლონ სამხედრო დავალებების წარმატებით შესრულება“ - აცხადებს კონსტანტინე სირბილაძე.
ბაზაზე სერტიფიკატების გადაცემის ღონისძიებას წინ უძღვოდა წვევამდელთა ფიცის დადების ცერემონია და საბრძოლო მოქმედებებში დაღუპულ ჯარისკაცთა მემორიალის პატივგება. ეროვნული უმცირესობის წარმომადგენლებს ქართული ენის სასწავლო კურსის დასრულება თავდაცვის ძალების აღმოსავლეთის სარდალმა, პოლკოვნიკმა ალექსანდრე კიკნაძემაც მიულოცა.
„ბაზაზე ჩვენთან ერთად მსახურობენ ჩვენი აზერბაიჯანელი ძმები. სერტიფიკატები გადაეცათ იმ სამხედრო მოსამსახურეებს, რომლებიც თავდაცვის სამინისტროსა და განათლების სამინისტროს ერთობლივი პროგრამით მომზადნენ ქართულ ენაში“ - აცხადებს პოლკოვნიკი, ალექსანდრე კიკნაძე.
ვაზიანის სამხედრო ბაზაზე სავალდებულო სამხედრო სამსახურში მყოფმა საქართველოს მოქალაქეებმა, ეროვნებით აზერბაიჯანელმა წვევამდელებმა, ჟვანიას სკოლის სახელმწიფო ენის სწავლების პროგრამის A1 დონის ინტენსიური სასწავლო კურსი გაიარეს.
„კმაყოფილი ვარ ქართული ენის კურსით. ენის ცოდნა მეხმარება სამხედროებთან კომუნიკაციაში. მე საქართველოს მოქალაქე ვარ და აუცილებლად უნდა ვიცოდე სახელმწიფო ენა!“ - ამბობს ეროვნებით აზერბაიჯანელი წვევამდელი ახვერდი შახვერდიევი.
ეროვნული უმცირესობის წარმომადგენელი წვევამდელებისათვის სახელმწიფო ენის სწავლების პროგრამას ვაზიანის საველე საწვრთნელ ბაზაზე ზურაბ ჟვანიას სახელობის სახელმწიფო ადმინისტრირების სკოლის პედაგოგები ახორციელებენ.