„ქალთა მოძრაობის“ წევრებმა პრეზიდენტის რეზიდენციასთან დიმიტრი გაბუნიას საპარლამენტო მდივნად დანიშვნა გააპროტესტეს. ათონელის რეზიდენციასთან მესამე სექტორი სალომე ზურაბიშვილთან შეხვედრასაც მოთხოვდნენ. „ქალთა მოძრაობა“ დიმიტრი გაბუნიას მისი ადვოკატობის დროს გაკეთებული განცხადების გამო უპირისპირდება, რომლითაც მოძრაობის წევრების შეფასებით, მან სექსუალური ძალადობა ნორმად მიიჩნია.
”ქალთა მოძრაობის” დამფუძნებელი, ბაია პატარაია დიმიტრი გაბუნიას წინააღმდეგ მოქმედების ერთ-ერთ მთავარ მიზეზად, ზვიად დევდარიანის საქმეზე გაკეთებულ განცხადებებს ასახელებს. „ჩვენ არ გვინდა, რომ რომელიმე მაღალ თანამდებობას იკავებდნენ ადამიანები, რომლებსაც სექსუალურ შევიწროებასთან ასეთი დამოკიდებულება აქვთ“, - ამბობს პატარაია.
თბილისის სახელმწიფო უნივერსიტეტის პროფესორი, სოფიო შამანიდი პრეზიდენტს ქალთა უფლებების დაცვისკენ მოუწოდებს.
თუ სალომე ზურაბიშვილი დღეს აქციის მონაწილეებს არ შეხვდება, „ქალთა მოძრაობის“ წევრები გეგმავენ, რომ პრეზიდენტის ადმინისტრაციას ოფიციალური წერილით მიმართონ და შეხვედრა მოითხოვონ.
სალომე ზურაბიშვილმა პრეზიდენტის საპარლამენტო მდივნად ადვოკატი დიმიტრი გაბუნია 18 დეკემბერს დანიშნა.
