დარწმუნებულები ვართ, რომ 2019 წლიდან საქართველოს სასაზღვრო პოლიცია მიიღებს ნატო-ს ფორმატში გამართულ წვრთნებში მონაწილეობას, - ამის შესახებ შს მინისტრმა გიორგი გახარიამ პარლამენტში განაცხადა.
მისი თქმით, ინტეგრირებული საზღვრის მართვა უდიდესი გამოწვევაა ქვეყნისთვის.
„ჩვენი მიმართულების შემდეგი ეტაპია საზღვრის დაცვა, სასაზღვრო პოლიცია. აქ მინდა ხაზგასმით აღვნიშნო, რომ ინტეგრირებული საზღვრის მართვა უდიდესი გამოწვევაა ქვეყნისთვის. აქ ჩვენი საერთაშორისო პარტნიორების სერიოზული დახმარება გვაქვს. ვიმედოვნებთ, რომ ეს დახმარება გაგრძელდება. მოგეხსენებათ, აქ გაჩნდა ახალი მიმართულება და ახალი სფერო - სანაპირო დაცვის კომპონენტი. დღეის მდგომარეობით, ჩვენი სტრატეგიული პარტნიორის მიერ გადმოგვეცა ორი „აილენდის“ მარკის გემი. ეს ის საშუალებაა, რომელიც შსს-ს აძლევს შესაძლებლობას შევიდეს შავი ზღვის ფარგლებში უსაფრთხოების ახალ ფორმატებში და ნატო-სთან თანამშრომლობის ახალი მიმართულება გახსნას. ეს აქამდე შსს-სთვის და ქვეყნისთვის არ არსებობდა. იმ გადამზადების ფორმატებით, რომელიც სასაზღვრო პოლიციას გააჩნია, დარწმუნებულები ვართ, რომ 2019 წლიდან საქართველოს სასაზღვრო პოლიცია მიიღებს ნატო-ს ფორმატში გამართულ წვრთნებში მონაწილეობას“, - განაცხადა გიორგი გახარიამ.
