29 სექტემბერს, ფილარმონიის დიდ საკონცერტო დარბაზში, „წარმომადგენლობითი სახალხო კრების" მხარდამჭერთა დარბაზის გაფართოებულ შეხვედრა გაიმართება, სადაც მიიღება გადაწყვეტილება და გამოცხადდება სრულიად საქართველოს „წარმომადგენლობითი სახალხო კრების" მოწვევის თარიღი. ამის შესახებ "ჯი-ეიჩ-ენს" "წარმომადგენლობითი სახალხო კრებიდან" აცნობეს.
"წარმომადგენლობითი სახალხო კრების" შესაბამის განცხადებაში ნთქვამია, რომ სრულიად საქართველოს „წარმომადგენლობითი სახალხო კრების" მოწვევის საკითხი დღის წესრიგში დაყენება ქვეყანაში დღეისათვის არსებულმა რეალობამ გამოიწვია.
"სააკაშვილსა და მის რეჟიმს მითვისებული აქვს საქართველო, საკუთარი კეთილდღეობის შესანარჩუნებლად ყოფს და ასხვისებს ჩვენს ქვეყანას, არ გვაქვს თავისუფალი სასამართლო, მედია, წართმეული გვაქვს აზრის გამოხატვის და არჩევანის თავისუფლება, ხელისუფლება ჩვენ მოდელირებული აბსურდის პირობებში გვაცხოვრებს. ქვეყანაში შექმნილმა ამ ურთულესმა ვითარებამ საბოლოოდ დაგვარწმუნა სრულიად საქართველოს „წარმომადგენლობითი სახალხო კრების" მოწვევის აუცილებლობაში", - ნათქვამია ზემოხსენებულ განცხადებაში.
"წარმომადგენლობითი სახალხო კრების" წევრების განცხადებით, ბოლო პერიოდში ნათელი გახდა, რომ ქვეყნის მოსახლეობისთვის საკუთარი ნების გამოსახატავად სახალხო კრება ერთადერთ გამოსავლად რჩება.
"ჩვენ ძალისხმევა არ უნდა დავიშუროთ და „წარმომადგენლობით სახალხო კრებაზე" საქართველოს მოსახლეობას უნდა მივცეთ შესაძლებლობა დღევანდელი ხელისუფლების პოლიტიკის მიმართ ღიად გამოხატოს საკუთარი დამოკიდებულება, ხმამაღლა განაცხადოს და მთელი მსოფლიოს გასაგონად დააფიქსიროს, სურს თუ არა მას შეეგუოს ქვეყანაში არსებულ რეჟიმს. მივიჩნევთ, რომ ყველა ის მოქალაქე, პოლიტიკოსი თუ საზოგადო მოღვაწე, ვინც რეალურად არ ეგუება ქვეყანაში გამეფებულ უსამართლობას, ვისაც რეალურად შესტკივა გული საკუთარ სამშობლოსა და ხალხზე, აქტიურ მოქმედებაზე უნდა გადავიდეს, რათა ჩვენს მოსახლეობას საკუთარი აზრის ღიად გამოხატვის შესაძლებლობა მივცეთ. ხალხს ამის სრული უფლება აქვს!", - ნათქვამია "წარმომადგენლობითი სახალხო კრების" წევრების განცხადებაში.
