„სერგო თეთრაძე თუ სადმე გადაადგილდებოდა, ხელმძღვანელობის ყურადღების ქვეშ იყო და მაშინდელი ავადსახსენებელი რეჟიმის მსხვერპლი გახდა“, - განაცხადა სასამართლო პროცესზე გლდანის ციხის ყოფილმა თანამშრომლემა, ბორის ფარულავამ, მეტსახელად ბასტიმ. ის თეთრაძის საქმეზე სასამართლოში მოწმის სახით იკითხება.
„როგორც ვიცი, ერთ-ერთი გაყვანის დროს, გარეშე პირებმაც აწამეს, მეც იქ ვიყავი. უფროსობა ჩამოვიდა – მუხაძე, ყაჭეიშვილი და კიდევ უცნობი პირები. გვითხრეს, რომ მიგვეტანა ქამარი და თასმები. ამის მერე ციხიდან, გვერდით კარიდან დირექტორის მანქანით გაიყვანეს. არ მინახავს, მაგრამ მსმენია, რომ სამხედრო პოლიციაში გაიყვანეს“, – განაცხადა ბორის ფარულავამ.
მისი თქმით, თეთრაძის საქმეზე კიდევ ერთი დაკავებული გორელაშვილი იყო, რომელზე მეთვალყურეობაც მას ვიქტორ ყაჭეიშვილმა დაავალა. ფარულავას განმარტებით, თეთრაძეს და გორელაშვილს აჩვენეს პატიმრების სქესობრივი კავშირის კადრები და დაემუქრნენ, „თუკი დანაშაულს არ აღიარებთ, თქვენც იგივე გელითო“.
„შემდეგ შეიყვანეს თეთრაძე ამ კამერაში და ისმოდა გამწარების ხმები. ამის მერე გორელაშვილმა სცადა თვითმკვლელობა სათვალის შუშით. ამასობაში მე დავიწყე ყვირილი, თავს იკლავს-მეთქი და გამოვარდნენ თანამშრომლები, დირექტორიც. თეთრაძის წამებას იღებდა დირექტორი და სხვებს ეუბნებოდა, ხომ ხედავთ, რა შეგვიძლიაო, ამაყობდა. მერე უცებ გაისმა ყვირილი – ექიმო, მგონი შემოაკვდათო“, – განაცხადა ბორის ფარულავამ.
ბორის ფარულავა, იგივე ბასტი 2012 წელს სასჯელაღსრულების მე-8 დაწესებულების უსაფრთხოების განყოფილების უფროსი იყო.
როგორც დღევანდელ პროცესზე ბორის ფარულავამ აღნიშნა, მისი ინფორმაციით, სერგო თეთრაძეს ჯაშუშობას ედავებოდნენ, მაგრამ ის არ აღიარებდა და ამიტომ კონტროლქვეშ იყო.
