„დაზარალებულ 5 ოჯახს კომპენსაცია გადაეცა, ნაწილთან კი მოლაპარაკება გრძელდება. თუ რა რაოდენობის თანხაზეა საუბარი, ამას ვერ დაგისახელებთ“, - აცხადებს „ჯი-ეიჩ-ენთან“ სასტუმრო „ლეოგრანდის“ იურისტი, კახა წერეთელი.
სამართალდამცავებმა 15 დეკემბერს სასტუმროს მფლობელი დაკითხეს.
„მფლობელი დაახლოებით, ერთი კვირის წინ დაიკითხა. გრძელდება შენობის ექსპერტიზა და ასევე, დაკითხვებიც. ექსპერტებთან მხოლოდ ტექნიკურ საკითხებზე გვაქვს შეხება, მათ იმ ინფორმაციას ვაწვდით, რასაც ისინი ითხოვენ. თუ რა იკვეთება, ეს გამოძიებამ იცის“, - აცხადებს წერეთელი.
როგორც იურისტი აღნიშნავს, ექსპერტების საქართველოს ფარგლებს გარეთ მოძიების და მოლაპარაკებების პროცესი კვლავ გრძელდება.
შეგახსენებთ, რომ ბათუმში, სასტუმრო „ლეოგრანდში“ ხანძარი 24 ნოემბერს, დაახლოებით, 22:00 საათზე გაჩნდა.
ხანძრის შედეგად 11 ადამიანი დაიღუპა, მათგან საქართველოს 10 და ირანის ერთი მოქალაქე. დაშავდა 21 ადამიანი, მათგან ერთი ისრაელის მოქალაქეა, 5 კი - თურქეთის.
მომხდარ ფაქტთან დაკავშირებით, გამოძიება სახანძრო უსაფრთხოების წესის დარღვევის მუხლით მიმდინარეობს.
