ჰიპერმარკეტ „გორგიას“ მფლობელის, გია გორგოშაძის გატაცების მცდელობის საქმეზე წინასასამართლო სხდომა გადაიდო. ამის შესახებ „ჯი-ეიჩ-ენს“ ბრალდებულის ადვოკატმა, თამარ აბესაძემ განუცხადა.
„6 შუამდგომლობა დავაყენეთ დაუშვებელ მტკიცებულებებად ცნობასთან დაკავშირებით. თუ სასამართლო ამ მტკიცებულებებს დაუშვებლად ცნობს, სისხლის სამართლის საქმე არსებითად შეიცვლება. ბრალდების მხარემ პასუხის გასაცემად დრო მოითხოვა. შესაბამისად, პროცესი გადაიდო.
ეს შუამდგომლობები ეხებოდა პირად ჩხრეკას, რომლის ოქმზეც პოლიციელებს ხელი არ აქვთ მოწერილი, ამას გარდა, ბრალდებულის გამოკითხვის 5 გვერდიან ოქმში, მხოლოდ მე-5 გვერდზეა ბრალებულის ხელომოწერა, ოქმი არასათანადოდაა შედგენილი.
ბინის დათვალიერების შედეგად ძალიან ბევრი ნივთია ამოღებული, მაგრამ ჩხრეკასთან დაკავშირებით, ბინის მესაკუთრის წერილობითი თანხმობა წარმოდგენილი არ არის. ჩვენ ამ სახის მტკიცებულებების დაუშვებლად ცნობასთან დაკავშირებით დავაყენეთ შუამდგომლობა“, - განაცხადა თამარ აბესაძემ.
წინასასამართლო პროცესი თბილისის საქალაქო სასამართლოში 5 დეკემბრისთვის ჩაინიშნა.
