ზიდანს შეუძლია ფეხბურთთან დაკავშირებით საზოგადოებას რჩევები მისცეს, ის ფეხბურთში ნამდვილად კარგია, ეს უნდა ვთქვათ, მაგრამ რაც შეეხება პოლიტიკას, არ ვარ დარწმუნებული, - ასე გამოეხმაურა „ეროვნული ფრონტის“ ლიდერი მარინ ლე პენი ზინედინ ზიდანის განცხადებას, რომელმაც საფრანგეთის მოქალაქეებს მოუწოდა, რომ მათ ყველაფერი უნდა გააკეთონ იმისთვის, რათა ლე პენის გაპრეზიდენტება თავიდან აიცილონ.
როგორც საფრანგეთის პრეზიდენტობის კანდიდატმა აღნიშნა, თუკი გავითვალისწინებთ ზიდანის შემოსავალს, ნათელია, რომ ის ხმას მაკრონს აძლევს.
„თუკი გავითვალისწინებთ ზიდანის შემოსავალს, მესმის, რომ ხმას მაკრონს აძლევს. ეს მისი აზრია. ზინედინ ზიდანს შეუძლია ფეხბურთთან დაკავშირებით საზოგადოებას რჩევები მისცეს, ის ფეხბურთში ნამდვილად კარგია, ეს უნდა ვთქვათ, მაგრამ რაც შეეხება პოლიტიკას, არ ვარ დარწმუნებული“, - აღნიშნა „ეროვნული ფრონტის“ ლიდერმა.
ცნობისთვის, საფრანგეთის საპრეზიდენტო არჩევნების პირველი ტური 23 აპრილს გაიმართა. საფრანგეთის საკონსტიტუციო საბჭოს მიერ დამტკიცებული შედეგებით, ემანუელ მაკრონმა ამომრჩეველთა ხმების 24,01%-ით პირველი ადგილი დაიკავა, ხოლო მარინ ლე პენი ამომრჩეველთა ხმების 21,30%-ით მეორე ადგილზე გავიდა. მეორე ტური 7 მაისს გაიმართება.
