”ქართული ოცნების” ლიდერების ფარული მოსმენების საქმეზე გამოტანილი განაჩენი გასაჩივრდება , - ამის შესახებ ერთ-ერთი დაკავებულის ადვოკატმა მამუკა ჭაბაშვილმა ჟურნალისტებთან განაცხადა.
მისივე თქმით, გამამართლებელი განაჩენი მივღებულია ყველაზე მძიმე მუხლში და ორწლიანი სასჯელი საჭირო არ იყო, რაზეც სააპელაციო სასამართლომ უნდა იმსჯელოს.
,,ნაწილობრივ გამამართლებელი განაჩენი მივიღეთ ყველაზე მძიმე მუხლში და მთელი ამ პროცესის განმავლობაში ის გარემოებები, რასაც პროკურატურა გვეუბნებოდა, რომ ხიზანიშვილმა ჩაიდინა, რომც დადასტურდეს, იქ არ გვქონდა გაფლანგვის მუხლი. მოსამართლემ გაიზიარა ჩვენი ეს მოსაზრება, თუმცა არ დაგვეთანხმა, რომ საერთოდ დანაშაული არ იყო ჩადენილი და გადააკვალიფიცირა უფლებამოსილების გადამეტებით. როცა დასაბუთებულ განაჩენს მივიღებთ ალბათ ამ ნაწილშიც გავასაჩივრებთ”, - განაცხადა ჭაბაშვილმა.
მოსამართლის გადაწყვეტილებით, ვაჟა ლელუაშვილს თავისუფლების 3 წლით, ლევან ქარდავასა და შოთა ხიზანიშვილს კი 1 წლითა და 6 თვით აღკვეთა განესაზღვრათ.
შინაგან საქმეთა სამინისტროს ყოფილ მაღალჩინოსნებს, შოთა ხიზანიშვილს, ლევან ქარდავასა და ვაჟა ლელუაშვილს ბრალად უფლებამოსილების გადამეტება, კომპიუტერული ვირუსების გზით ყოფილი ოპოზიციის ლიდერების უკანონო მოსმენები და ბიძინა ივანიშვილის დაცვის თანამშრომელ ბესიკ სურმავაზე ზეწოლა ედებოდათ.
საქმე ეხება 2012 წლის არჩევნებამდე „ქართული ოცნების“ ლიდერების საუბრების ფარული ჩანაწერების კომპიუტერული ვირუსის გზით მოპოვებასა და გამოქვეყნებას.
