რუსთავი 2-ის საქმეზე სასამართლო პროცესი გადაიდო. ამის შესახებ შუამდგომლობით მოსამართლეთა კოლეგიას ტელეკომპანიის გენერალურმა დირექტორმა, ნიკა გვარამიამ მიმართა. როგორც გვარამიამ აღნიშნა, ტვ საქართველოს ყადაღაზე სასამართლოს გადაწყვეტილება უცნობია. მისი თქმით, ეს გარემოება ხელს უშლიდა მხარის პოზიციის ჩამოყალიბებას.
ქიბარ ხალვაშის ადვოკატი სხდომის გადადების წინააღმდეგ გამოდიოდა. გადაწყვეტილება ტელეკომპანია საქართველოს ყადაღის შესახებ 17 მაისს უნდა გახდეს ცნობილი.
დღევანდელ პროცესზე ნიკა გვარამიამ სხდომის თავმჯდომარის ნატა ნაზღაიძის აცილებაც მოითხოვა. გვარამიას მოსაზრებით, ნაზღაიძე რუსთავი 2-ის მხარეს ზღუდავდა და აზრის დამთავრების საშუალებას არ აძლევდა. სასამართლომ შუამდგომლობა არ დააკმაყოფილა.
დღესვე ნიკა გვარამია სასამართლოს უპატივცემულობის გამო 500 ლარით დააჯარიმეს.
მომდევნო პროცესი 30 მაისს 11 საათზე გაიმართება.
