საქართველოს ყოფილი პრეზიდენტის მიხეილ სააკაშვილისა და სახელმწიფო დაცვის სამსახურის ყოფილი უფროსის თემურ ჯანაშიას საქმეზე დღეს საქალაქო სასამართლოში არსებითი განხილვა გაიმართა.
დღეს ბრალდების მხარის 2 მოწმე დაიკითხა. მათი განცხადებით, სახელმწიფო დაცვის სპეციალური სამსახურის ყოფილი უფროსის, ოთარ ქველიძის მიერ დაევალათ საზღვარგარეთ სააკაშვილის ვიზიტების დროს თანხის წაღება, რომელიც სააკაშვილის მითითებით იხარჯებოდა. მოწმის განცხადებით ეს პროცესი მას შემდეგაც გაგრძელდა, რაც ქველიძის ადგილი თემურ ჯანაშიამ დაიკავა.
"თანხები გადახდილი მაქვს სააკაშვილის სხვადასხვა მომსახურებაში, სხეულის გაჯანსაღების ცენტრში, დერმატოლოგიურ მომსახურებაში, პლასტიკურ ქირურგიაში, სპა სალონში, ველოსიპედების დაქირავებაში და ა. შ.", -განაცხადა მიხეილ სააკაშვილის დაცვის ყოფილმა წევრმა გიორგი ჟოჟონაშვილმა.
მიხეილ სააკაშვილსა და თემურ ჯანაშიას სახელმწიფო 9 მილიონ ლარს ედავება. არსებითი განხილვა საქალაქო სასამართლოში 13 მაისს გაგრძელდება.
