დედა-შვილ ნატო და გურამ კვეზერელების მკვლელობაში ერთ-ერთი ბრალდებული - გიორგი ყუფარაძე საბერძნეთში დააკავეს, -ამის შესახებ გავრცელებულ ინფორმაციას შსს-შიც ადასტურებენ. უწყებაში აცხადებენ, რომ ბრალდებულის საქართველოში ექსტრადირებისთვის პროცედურები დაწყებულია.
ორწლიანი ძებნის შემდეგ, 20 აპრილს, 29 წლის გურამ კვეზერელის ცხედარი სამართალდამცავებმა საკუთარ ეზოში, კასრით ჩამარხული იპოვეს. გამოძიების ინფორმაციით, ახალგაზრდა მამაკაცს მკვლელობაში ბრალდებულმა ორმა პირმა ჯერ მრავლობითი ჭრილობა მიაყენა, შემდეგ კი კვალის დაფარვის მიზნით, კასრში მოათავსეს და მჟავა დაასხეს. გამოძიების ინფორმაციითვე, ბრალდებულებმა გურამ კვეზერელის მკვლელობის შემდეგ, იმავე დღეს, მისი დედა მოკლეს. ნატო კვეზერელი ორდღიანი ძებნის შემდეგ გარდაცვლილი საკუთარი ბინის აბაზანაში ნახეს, სახლიდან კი 12 ათასი დოლარი და სხვა ნივთები იყო წაღებული. კვეზერელის მკვლელობის საქმეზე ამ დროისთვის სისხლის სამართლის პასუხისგებაში დანაშაულის შეუტყობინებლობის ბრალდებით ორი, განზრახ მკვლელობის მუხლით კი ორი პირია ბრალდებული. სასამართლომ მკვლელობის საქმეზე ბრალდებულ გიორგი ყუფარაძეს, რომელიც მიმალვაში იყო, დაუსწრებლად, აღკვეთის ღონისძიების სახით პატიმრობა შეუფარდა. რაც შეეხება ამავე საქმეზე ბრალდებულ კიდევ ერთ პირს ვასილ გოშაძეს, იგი მოსამართლემ აღკვეთის ღონისძიების გარეშე დატოვა, რადგან იგი უკვე მსჯავრდებულია და სასჯელს სისხლის სამართლის სხვა საქმეზე, სასჯელაღსრულების დეპარტამენტში იხდის.
