კუდ-ის ყოფილ მაღალჩინოსანთან, ვაჟა ლელუაშვილთან, დაკავშირებით პროკურატურას ჩვენებას გაზეთ „ქრონიკა +“-ის რედაქტორი ელისო კილაძე აძლევს.
კილაძე პროკურატურას იმ ვიდეოჩანაწერს გადასცემს, რომელიც სავარაუდოდ, ჩაწერილია ვაჟა ლილუაშვილის სახლში.
“ჩვენს არქივში ინახება ერთი ძალიან საინტერესო ვიდეოფირი. ეს ვიდეო გადაღებულია ვაჟა ლილუაშვილთან სახლში. ფირის არსებობა თავისთავად უკვე ნიშნავს დანაშაულს იმიტომ, რომ ის უკანონოდ იწერდა პირს, რომელსაც ესაუბრება”, - აცხადებს კილაძე.
კილაძის განცხადებით, ლელუაშვილი გარკვეული თანხის სანაცვლოდ ზეწოლას ახორციელებდა ერთ-ერთ ბიზნესმენზე.
“მე არ ვიცი, ვინ არის ის ბიზნესმენი და, ალბათ, პროკურატურა ამას დაადგენს. საუბარია წილების გაფორმებაზე, 150 ათას დოლარზე და რაღაც ქონების დათმობაზე და დაბრუნებაზე. რაც შეეხება ფარულ ჩანაწერებს, ერთადერთი ინფორმაცია, რაც მაქვს, გახლავთ ის, რომ ვაჟა ლილუაშვილი გამუდმებით თან დაატარებდა ლეპტოპს, რომელშიც ჰქონდა ეს არქივი,“ - აცხადებს კილაძე.
