ფონიჭალაში მოკლული ნინა რომანაძის მეუღლე ოთარ მამფორია აცხადებს, რომ მკვლელობის მოტივის შესახებ ინფორმაცია არ აქვს. წუხანდელი დაკითხვის შემდეგ მან ჟურნალისტებთან განაცხადა, რომ დილით მეუღლე და უმცროსი შვილი დაძინებული დატოვა, უფროსი შვილი კი სკოლაში წაიყვანა.
მისი თქმით, შვილისა და მეუღლის დაღუპვის შესახებ მან სამსახურში გაიგო.
დაკითხვის დეტალებთან დაკავშირებით მამფორია აცხადებს, რომ ჰკითხეს - თავად ხომ არ ჩაუდენია ეს მკვლელობა. თუმცა მისი თქმით, სამართალდამცავებმა შემდგომ ეს ვერსია გამორიცხეს. მამფორიას ინფორმაციით, მან სამართალდამცავებს ასევე უთხრა, რომ მის ოჯახს მტრები არ ჰყოლია.
მკვლელობა გუშინ ზემო ფონიჭალაში მოხდა. გარდაცვლილები არიან 35 წლის ნინა რომანაძე და მისი 3 წლის გოგონა. ნინა რომანაძე საცხოვრებელი ბინის მისაღებ ოთახში იპოვეს, ხოლო 3 წლის გოგონა საძინებელში დამწვარი ნახეს. 35 წლის ქალს ცივი იარაღით ყელის არეში ჭრილობები აქვს მიყენებული.
მომხდარზე გამოძიება სისხლის სამართლის კოდექსის 109-ე მუხლით მიმდინარეობს, რაც დამამძიმებელ გარემოებებში განზრახ მკვლელობას გულისხმობს.
