მამუკა ახვლედიანი თბილისის საქალაქო სასამართლოს თავმჯდომარეობიდან მისი გათავისუფლების გადაწყვეტილებას გაასაჩივრებს, - ამის შესახებ მან ჟურნალისტებთან მართლმსაჯულების სახლში არასამთავრობო ორგანიზაციებთან გამართულ შეხვედრამდე განაცხადა.
მისი თქმით, გათავისუფლება სასამართლო სისტემაში არსებულ პრობლემებთან დაკავშირებით გაკეთებულ მის განცხადებებს უკავშირდება.
„შესაძლებელია, ეს იმას უკავშირდებოდეს, რომ დროთა განმავლობაში ბევრი დაინახავდა იმ სიმართლეს, რაც სასამართლო სისტემაში ხდებოდა, ის, რისიც ყველაზე მეტად ეშინიათ. ეს არის პირდაპირ ჩემი განცხადებების გამო მომხდარი ფაქტი. აუცილებლად სასამართლო წესით გავასაჩივრებ, თუნდაც, იმის გამო, რომ როცა რომელიმე მოსამართლის უფლებები შეილახება, მათ შიში არ ჰქონდეთ. შესაბამისად, დავამტკიცებ სასამართლო სისტემაში, რომ ასე მოსამართლის გათავისუფლება არ შეიძლება“, - განაცხადა მამუკა ახვლედიანმა.
თბილისის საქალაქო სასამართლოს ყოფილი თავმჯდომარე არასამთავრობო ორგანიზაციების წარმომადგენლებს მართლმსაჯულების სახლში ხვდება.
