,, დამოუკიდებელი საგამოძიებო ორგანოს შექმნა უნდა იყოს პასუხი, არასათანადო მოპყრობისა და წამების ფაქტებზე”, - ამის შესახებ საქართველოს სახალხო დამცველმა უჩა ნანუაშვილმა ფონდ „ღია საზოგადოება - საქართველოს“ ორგანიზებით სასტუმრო „ჰოლიდეი ინში“ გამართულ კონფერენციაზე განაცხადა, სადაც საქართველოში დამოუკიდებელი საგამოძიებო ორგანოს შექმნის საკითხზე მთავრობის, პარლამენტის, საერთაშორისო და ადგილობრივი ორგანიზაციების, საელჩოების წარმომადგენლები და დამოუკიდებელი ექსპერტები მსჯელობენ.
„ვხედავთ, რომ პრობლემა ამ სფეროში კვლავ არსებობს. ამიტომ, აუცილებელია სისტემურ პრობლემებზე სისტემური პასუხების გაცემა. სწორედ ასეთი დამოუკიდებელი ორგანოს შექმნა უნდა იყოს პასუხი, არასათანადო მოპყრობისა და წამების ფაქტებზე“, - განაცხადა უჩა ნანუაშვილმა.
შეხვედრაზე წარდგენილია კანონპროექტი დამოუკიდებელი საგამოძიებო ორგანოს მექანიზმის შესახებ, რომელიც 20-მდე არასამთავრობო ორგანიზაციამ შეიმუშავა.
პროექტის ავტორთა თქმით, დამოუკიდებელი საგამოძიებო მექანიზმი სამართალდამცველთა კონტროლის საშუალება იქნება და გაზრდის მათ ანგარიშვალდებულებას მოქალაქეების მიმართ. იგი განახორციელებს სამართალდამცავთა მიერ ჩადენილი უკანონო ქმედებების გამოძიებას და სისხლისსამართლებრივ დევნას.
დამოუკიდებელი საგამოძიებო მექანიზმის კანონპროექტის შემუშავების პროცესში, არასამთავრობო ორგანიზაციები თანამშრომლობდნენ საქართველოს სახალხო დამცველის ოფისთან.
