იუსტიციის უმაღლესი საბჭო დღევანდელ სხდომაზე თბილისის საქალაქო სასამართლოს თავმჯდომარის, მამუკა ახვლედიანის მხრიდან გამოვლენილ შესაძლო დარღვევებზე იმსჯელებს. იუსტიციის უმაღლესი საბჭოს წევრის შოთა გეწაძის განმარტებით, საუბარია საბჭოს უფლებამოსილებაზე სასამართლოში ვიწრო სპეციალიზაციების განსაზღვრის თაობაზე.
"გამოვლინდა შესაძლო დარღვევები, რაც უკავშირდება თბილისის საქალაქო სასამართლოში მენეჯმენტს. აქ საუბარია შესაძლო დარღვევებზე. როგორც ჩანს, საქალაქო სასამართლოს თავმჯდომარის მიერ გადაწყვეტილია ისეთი საკითხები, რომელთა გადაწყვეტაც შედის იუსტიციის უმაღლესი საბჭოს კომპეტენციაში. დღევანდელ სხდომაზე ვაპირებთ ეს საკითხი შევაფასოთ. საუბარია საბჭოს უფლებამოსილებაზე სასამართლოში ვიწრო სპეციალიზაციების განსაზღვრის თაობაზე. როგორც ჩანს, ეს ვიწრო სპეციალიზაციები განხორციელებულია თავად საქალაქო სასამართლოს თავმჯდომარის მიერ", - განაცხადა გეწაძემ ჟურნალისტებთან საუბრისას.
იუსტიციის უმაღლესი საბჭოს დღევანდელ სხდომაზე მიწვეული იყო საქალაქო სასამართლოს თავმჯდომარე, თუმცა მამუკა ახვლედიანი სხდომას არ ესწრება.
