ბიზნესმენ ბესო ხარძიანის მკვლელობის საქმეზე მოსამართლე ლელა ნოზაძემ დააკმაყოფილა ბრალდების მხარის შუამდგომლობა მოსამართლის აცილების თაობაზე.
ბრალდების მხარემ აღნიშნული შუამდგომლობის არგუმენტად 2011 წელს იმავე მოსამართლის მიერ ხარძიანის საქმეზე გამოტანილი განაჩენი მოიყვანა.
,,შუამდგომლობის არგუმენტად ის გარემოება გვქონდა, რომ 2011 წელს ამ მოსამართლის მიერ განხილულ იქნა ხარძიანის საქმე და ბრალდებულად ცნობა. ბრალდების მხარის თქმით, ეს გარემოება წარმოადგენდა მის აცილების საფუძველს და შესაძლო იყო, რომ მოსამართლის მიერ საქმის განხილვას გამოეწვია სასამართლოს მიკერძოებულობაში ეჭვის შეტანის საფუძველი", - განაცხადა პროცესის დასრულების შემდეგ პროკურორმა ამირან გულუაშვილმა.
მისივე ინფორმაციით, შემდგომ ეტაპზე მოხდება საქმის სხვა მოსამართლეზე გადაწერა, რის შემდეგაც ახალი მოსამართლე ჩანიშნავს პროცესის თარიღს.
შეგახსენებთ, რომ ბიზნესმენი გასული წლის 28 მარტს მოკლეს. მას საკუთარ სახლთან სამჯერ ესროლეს. მთავარმა პროკურატურამ ბიზნესმენის მკვლელობის საქმე მიმდინარე წლის 21 იანვარს გახსნა.
მკვლელობისთვის ბრალდებულები არიან რუსეთის მოქალაქე ოლეგ დოევი და უკრაინის მოქალაქე ალექსანდრ დამეტოვი, რომლებსაც აღკვეთი ღონისძიების სახით, წინასწარი პატიმრობა დაუსწრებლად შეუფარდეს.
