ეკა ბესელიას პირადი ცხოვრების ამსახველი მასალის გავრცელების მცდელობის ფაქტზე გამოძიება დაიწყო, - ამის შესახებ მთავარი პროკურირის მოადგილე გიორგი გოგაძე აცხადებს. მისი შეფასებით, ეს არის ,,ამაზრზენი დანაშაული“ და შესაბამისად, რეაგირება იქნება უმკაცრესი.
,,რა ეტაპზეა გამოძიება, ამაზე არ მაქვს ინფორმაცია. რეაგირება იქნება უმკაცრესი, რადგან ეს არის ამაზრზენი და ამორალური დანაშაული. ისტორიამაც აჩვენა, რომ ჩვენ ამ დანაშაულის მიმართ ვიქნებით უმკაცრესი", - განაცხადა გიორგი გოგაძემ.
როგორც ცნობილია, მთავარმა პროკურატურამ მოქალაქე გელა ღურწკაია დააკავა. ღურწკაიას ბრალი სისხლის სამართლის კოდექსის 19-ე და 157-ე მუხლებით წაუყენეს, რაც პირადი ან ოჯახური საიდუმლოს უკანონოდ გამოყენება-გავრცელებას გულისხმობს.
